تسمحيلي بالرقصه دي

1
جغرافيا
وش القمر مجروح
طالع علي سطوح بيتنا
وش القمر ف البوح ..
يشبه لغربتنا / عايش حكاوينا
مزكوم ف غنوتنا
والحلم متداري
مهزوم ومش داري
وبيحضن عيونك ف الخلا
والدنيا لو متقفله اربع جهات
بالخوف
ف عنيك جغرافيا الهوا
والمناخ اربع حروف ..
ب ح بّ ك
2
يتامي
الليل وحضنك ..
لتنين حبايب ف المزايا
لتنين وش واحد ف المرايا ..
عيال يتامي
لتنين جناح يمامه / حزين
وبيلم ف كسوره
الليل وحضنك / وطن ..
طول السنه محروم غُنا
قلبه اللي داب بيدق ع الابواب
يوماتي ..
مستني م الفرح دوره
3
ضحكتين
من وحي الكلمة الشوف
زمان وكلّه خوف ..
من ضحكتين اتعوّدا ..
يموتوا قبل مايبتدوا ..
زمن الوصول / طرح الفصول ..
رفض الألم
4
بحبِّك
مفيش جديد ف التعب ..
لسّه العصافير بتطير
وتغنّي غنوتها
وصيّادها بيعد الدقايق
والساعات
يقطف حلاوتها
ويحن للحزن الوتر
لسّه القتيل له وش واحد
والقاتل أربع صور
لسّه بحبك ف كل حاجه
وكل حاجه ..
لسّه بتخاف م السفر
5
ضل
اقولِّك ..
خليكِ فارده ع الزمان ضلِّك
لملمينا
بعترينا
واكبري
ولو مرّة حسّيتي الالم
ماتسكتيش وترغرغي ..
علي منبري
6
تسمحيلي بالرقصة دي ..
الخوف الصغيّر
والصمت الكبير
لتنين شقايق ف الهموم
واحد يشد، والتاني يرخي
لحد مايغيب النهار
لتنين شقايق ف الحصار
وانكسار الحلم
والضحكة الجميلة
وانا وانتي روح بديلة / للفرح
وسط الميدان ..
( تسمحيلي بالرقصه دي )
7
اجمل كتير
بتقطّعي من لحمك يوماتي
وبتدّي
أنا لمّا يجي دوري / عدّي
وكأنّي طيف
أجمل كتير لو تحضنيني
وتقولي شتا
وأقولك صيف
8
بلاش تفارق
توعدني بأيه ؟
( خلّيك هنا خلّيك
بلاش تفارق ... )
وافتح شباك وأنا بستناك
وعنيّا عليك .. م الخوف
شارده
والليل فراش ع المعاش
بيكح م الخضه
دي الضحكه لو عارضه
ممكن تداوي ..
ف العشق قلب عقيم
هيه الحزينه ف الفرح
تبقي واحده م المعازيم ؟!