الجراد .. إنه طائر النهضة ..!

الحمد لله أخيرا طلع وبان وعليه الأمان طائر النهضة اللى كانوا بيحكوا عليه فى سالف العصر والزمان!!
وأخيرا عرفنا أن فى طائر للنهضة بجد وحق وحقيقى وأن الكلام دا مش أشاعة، ولا كدب ولا تخاريف .. لا دا فى طائر نهضة بجد .. ظهر فى سماء المحروسة .. أنه الجراد ياجدعان .. ألا تكبرون .. تكبير وتهليل بقى يارجالة ..!!
أخيرا وبعد سنتين عجاف مشفناش فيهم حاجة ولا عرفنا ملامح حاجة بعد الثورة العظيمة دى .. وبعد ما احترنا كتير وعقلنا طار من التفكير وسألنا نفسنا عن طائر النهضة دا وهل هو بيبيض ولا بيولد وهل هو بيطير أم بيمشى وبس .. وهل هو يشبه الطائر المجنح أم التنين أبو جناحين ؟ ..
أخيرا ظهر وبان وحلق فوقنا فى كل مكان فى التجمع والمقطم والعين السخنة كمان .. أنه الجراد .. طائر النهضة ..!!
وأظن دلوقت بقى كل واحد منا لازم يلزم حدوده ونهدأ بقى ونعرف أن مفيش حد بيكدب ولا بيفتى وأظن بقى ربنا كسفنا وظهر الحق وظهر الباطل .. وظهر للوجود طائر النهضة ..!!
ويارب طائر النهضة العظيم دا أبو جناحات كبيرة يضلل علينا ويجبلنا الخير بدل ما يكون وجوده وش النحس ويأكل الأخضر واليأبس زى ما بيقولوا إن الجراد بيعمل كدا فعلا .. بس هيأكل إيه هو أحنا لاقينا نأكل أصلا .. !!
وعقبال يارب ما تظهر ملامح تانية للدولة المصرية غير ملامح طائر النهضة أو يظهر للنور مشاريع الحكومة المصرية ومجهوداتها فى توفير الأمن والأمان للشعب وتوفير لقمة العيش للمواطن الغلبان ومشاريع تحل مشاكل البطالة والعنوسة والمياه والمجارى والتلوث والمرور ونشوف مظاهر التقدم والرقى فى كل نواحى الحياة فى مصر!!