أفلام أطفال أون لاين

دي خارجه من قلبك!
زي طلقة رصاصة.
البير مالوش قرار.
وخيالك بيوسع ع الفاضي
ده طيران واللا سقوط؟
هاكونا مطاطا
أرسم الضلمه بعيوني
وأخطط بفرع شجرة في الهوا
نفسي اجري جنب النهر،
لما أعطش أشرب
ولما أرتوي أغني
ولما أغني أنسي..
تتبدد كل المخاوف
وتتمحي معاها
نظرة الأسد الصغير.
لحظة وقوع أبوه من الجبل
وانهياره لما لقاه ما بيردش
والمخادع اللي فهمه ان السبب هو وطموحه.
الخيانة بتلف العصور
وبتظهر حتي في أرض العزة!
حكاية لعبة
ايديك مفتوحة جناحات
مستغرب رنة انينك.
بتتردد من آخر البير،
ما عرفتهاش ازاي؟
دي خارجه من قلبك!
زي طلقة رصاصة.
البير مالوش قرار.
وخيالك بيوسع ع الفاضي
ده طيران واللا سقوط؟
لازم تقف قدام المرايه
وتطلع لسانك
للأفكار اللي خارجه من دماغك
وبتجري زي القطر
لازم تعرف
انك يتلعب بيك بس
انت مش رائد فضاء
مهمتك تبسط صاحب اللعبة.
المخوفاتي نؤر حياتي
شلبي سلوفان
مدير شركة جديدة للطاقة.
بس المره دي
مصدرها من ضحك الأطفال.
يا شلبي يا بن سلوفان
خد الطاقة من الشمس.
من البترول.
من اي حاجه
وابعد بقه عن الأطفال
لاتضحكم ولا تخوفهم
علشان تاخد منهم.
خليهم يعيشوا سنهم.
في براح الدنيا.
مدغشقو
اللي جاي هربان م الجليد
والهربان م الترف
حلم الحياة البرية أقوي
لكن لما تكتشف ان جواك مفترس.
يعرف القلب القسوة
فيجتهد من تاني
عشان يرجع للرقص
في حديقة حيوان نيويورك
طائر البطريق
ماطارش.
لانه ما بيعرفش.
لكن خد بالك منه كده
جريته ظريفه
وبياكل بساريه.
حركة راسه جنان
جسمه املس
لو مسكته
أكيد يتزفلط
اسمراني
والجليد علي مناخيره
فبلاش تفكر
هو طائر
والا مش طائر
الداهية بجد
زي ما احنا مصويين عيونا عليه
فيه ناس مصويين بنادقهم ناحيته.
بن تن
بقيت أجمع استيكراته
وألذقها علي الكراريس
وعلي حيطان أودتي
وعلي جدار قلبي
وألبس ساعته
الولد اللطيف
البرئ ده
بيتحول لوحش!
مثلا
وحش بأربع ايدين
هو ده اللي ح يلم
كل اللي بيدوروا علي عيوبي،
عشان يكسروني
الحب لدرجة الضعف كارثة.
ديناصور غضبان
عايز أرسم ديناصور
ياخد الصفحة بحالها
ولو غضب من اللي حواليه
يبانوا أقزام
من الأسد لأطول شجرة.
وانادي لأبني
يختبر الرسمه
ويفحص سنانه
لو ماشهدش انها حاميه
يقول لي: عيد الرسمه تاني
اللي عايز يرسم ديناصور
لازم يرسمه صح.
صراع الأجيال
قلت العنين البيضا عجز.
قاللي غلطان.
العنين البيضا شراسه.
بتخوف في الضلمة.
اخدته في حضني.
ماتقوم بقه نشرب كوباية حليب دافي،
ونشم بخارها.
خليك جنبي.
اتعلق في طرق أحلامك .
مش عايز أضيع منك.