زواج.. من غير ماما ؟؟!!

هو لسه بيدور علي عروسة ؟؟
لأ بطل وزهق..
- معقولة واحد بالإمكانيات دي ومش لاقي بنت الحلال..
- لأ ما هو شاف أكتر من واحدة الأولي كانت كويسة وشكلها كان عاجبه أوي بس طول المقابلة مفتحتش بقها.. مفيش غير ابتسامة مرسومة علي وشها وبس...!! وطبعا قال أنا كده معرفتش حاجة عنها ولما بدأ يفتح الكلام كانت بترد بالقطارة.. قال لأ هو أنا ناقص
- عنده حق السكوت الزيادة بيضايق.. طيب دي واحدة ميلحقش يزهق.
- لأ ما هو شاف واحدة تانية الأول قعدت ساكتة وبعدين لقيناها عدلت الكرسي وهات يا أسئلة تقولي هايقدم علي وظيفة، ماسابتش من أول ما اتولد لغاية بيشجع نادي إيه.. لما الواد عرق من كتر الأسئلة..
- ياه وليه ده كله ؟؟!!
- بتقول هي متعرفهوش كويس ومش هاتقعد تستني الأيام تظهر طباعه وهي مش بتحب المفاجآت.
- والله البنات بقت واعية.. ودي مكملتش ليه ؟؟
- أبدا بعد ما خلصت أسئلة سألته بكل ثقة أصلها بصراحة مال وجمال زي ما بيقولوا وعلم وعيلة.. يا تري إيه إللي كنت تتمناه ومش موجود في؟؟
- امم.. قال إيه ؟
- قال لها وبمنتهي البساطة ولا حاجة اتمنتها موجودة فيكي..!!
- يا كسفتها!
- كسفة إيه.. دي راحت قايمة ومبتسمة وقايلة ميرسي ربنا يوفقك..؟!! الأخيرة دي إللي حرمته الصنف كله .. إنتي عارفة انهم من الأعيان، وخاله عمدة كبير دوروا لغاية ما لقوا واحدة ممتازة من كله وهو بصراحة طار بيها وفرح رغم إن طلباتها كانت كتير أوي لكن هو مقتدر مش هايفرق مهر 100 ألف وشبكة 50 ألف وفستان الفرح.. والغريب إن كل شوية مامتها تقول إحنا بنشتري راجل الماديات دي آخر حاجة نفكر فيها !!
- لأ ما هو واضح وبعدين إيه إللي حصل
- أغرب من الخيال.. وهم بيتفقوا بقي علي آخر الإجراءات وتحديد الخطوبة والفرح.. خاله قال لأ إحنا لازم نكلم الحاجة... دي هي الخير والبركة..
- لقينا العروسة ومامتها كأن عقربة قرصتهم والعروسة راحت منفوضة وهي آخر عصبية وبتبص للعريس إيه ماما ؟؟ ماما مين ؟!!
- قال لها والدتي.. ؟؟
- بس انت مقلتش إن عندك ماما خالص وأنا معملتش حسابي علي كده..؟؟
- رد خاله وقال ودي تعملي حسابها إزاي ؟؟ حضرتك عندك ماما وأنا عندي ماما اشمعني يعني هو...
- هههههه عنده حق وبعدين...
-أبدا قالت له الصراحة أنا لا يمكن أتجوز واحد عنده ماما أبدااااا!! اتصرف وتعالي بس لو عدي شهرين ومتصرفتش أنا مش هستناك...!!؟