أنا بحلم

أيوه بحلم
بحلم وحلمى سقفه عالى
حلم أبداً ملوش حدود
باستخدم فيه حقى المشروع
إنى أعيش زى التانين
أهرب فيه من الأحزان
أعيش فيه مع الأوهام
أطير فيه زى العصفور
أدور فيه عن السعادة
عن السلام
عن الحب
عن الأمان
عن كل حاجة وأى حاجة
أصلهم قالولنا زمان
إن الدنيا مش بتدى كل حاجة
ولما تدى
قصادها تاخد أى حاجة
وأنا ف حلمى بلااااااااااقى كل حاجة
بس غمض عينيك
غمض عنيك وأحلم معايا
أحلم معايا بناس تانية
ودنيا تانية
دنيا مفيهاش الإخلاص بقا موضة قديمة
مفيهاش خدمة قصاد خدمة وإيه المقابل
دنيا بلا شعارات
بلا سخافات
بلا حماقات
ليه
ليه الإخلاص بقا موضة قديمة
والذوق بقا معدوم
والكره فكل مكان
كله اتبخر كله طار
كله راح مع التيار
احلم وطير كما العصفور
بس حاسب أيوه حاسب!
حاسب لأن مهما كان السقف عالي
فله نهاية
هتفوقك
وترجعك
تانى تدورعلى أصل الحكاية !
والحكاية إنه حلم أيوه حلم
بس جرب ف يوم تطير وإحلم معايا