استراحة محارب

ساعات بخاف على مصر
وساعات مابخفش
أقول طنش
كبر دماغك
بيع القضية وعيش حياتك
من غير هموم
ولا سياسة ولا مناهدة
إعمل غبى وخليك حمار
وبلاش تعاند
وشوف الموجة رايحة لفين
خلى الوطن سبوبة
لقمة طرية
خليك مع العايمة
إشبط ف كل المراكب
إكتب أناشيدك على شراعها
طبل وغنى
ساعة الغرق نط وسبها
إشبط ف مركب غيرها
إكتب أناشيدك على شراعها
طبل وغنى
ساعات بخاف على مصر
وساعات مابخفش
أقول نفض
مادام هى عاجبها المر
وتتمكيج وتدلع لجلادها
وتغمزله على عينها
وبتواعده ف سواد الليل
أقول نفض
إسمح لعقلك ينسحب بهدوء
من غيرمكابرة
الفارس المهزوم جبان
والفارس الهربان جبان
راح تفرق أيه
إرفع راياتك وإنسحب بهدوء
الإنسحاب أصبح فريضة
الانسحاب يصبح قرار
لما القلوب تتعب
لما اللسان يعجز
لما الوطن يلبس ملابس خليعة
لما الحيل تفشل ف إقناعه
يصبح قرار الإنسحاب واجب
يصبح ثباتك ف الميدان هذيان
الحلم يصبح مادة للسخرية
وإيه الفايدة م الأحلام
من غير ما تتحقق
وإيه الفايدة م الأوطان
من غير ما تتصدق
ساعات بخاف على مصر
وساعات مابخفش
أقول الصمت أفضل
أدفن قصاقيص الورق
وأطفى نور الغرفة
وأحاول أنام
أبيع الحلم مجاناً
وبدون مقابل
ساعات بخاف على مصر
وساعات مابخفش
وساعات تبعنى ع الأخر
وساعات مابنمش