التيار الشعبى يدعو المواطنين لرفض الدستور فى بيان ساخر

قام التيار الشعبى المصرى، بتوزيع بيان لتوعية المواطنين برفض الدستور، حمل عنوان "المواد الملاكى لتمكين الإخوان".
وجاء فى بيان التيار، ما فيش دستور فى الدنيا بيخلى رئيس الجمهورية يعين رؤساء الهيئات اللى بتراقب عليه، لما الرئيس يعين الناس اللى المفروض أنها تراقبه وتبلغ البرلمان والنيابة لو بيعمل حاجة غلط، هيعرفوا يراقبوه إزاى؟!
لما الدستور يخلى رئيس الجمهورية يعين القضاة ويعين النائب العام اللى المفروض أنهم يحاسبوه لو أخطأ، النائب العام إزاى يبقى محايد؟! لما الدستور يخلى رئيس الجمهورية يعين القضاة بتوع المحكمة الدستورية إزاى يقدروا يقفوا قدامه لو غلط"؟!
لما الدستور ما يديش سلطات وصلاحيات كفاية للمفوضية اللى بتشرف على الانتخابات إزاى نضمن أن الانتخابات ما تتزورش تانى زى زمان؟! لما الدستور يخلى الجهاز الإدارى للدولة هو اللى يقسم الدوائر الانتخابية، إزاى نضمن أن الدوائر دى ما تتقسمش زى زمان علشان مصلحة الحزب الحاكم؟!
وكمان مواد انتقالية اتحطت أخر الليل بتنقل سلطة التشريع لمجلس الشورى اللى الشعب انتخبه عشان بمشاركة متزيدش عن 10 %، عايزين يخلوا مجلس الشورى ده بنفس تشكيله يفضل سنة بعد انتخاب مجلس النواب الجديد، شرطا أن المجلس اللى عايزينه يفضل مكمل وأعطوه وفقا للدستور الجديد صلاحيات تشريع كاملة الشعب مانتخبهمش على أساسها هم مسيطرون عليه.