راجعين

لميدان الحرية
شايلين أكفان على كفوفنا
ومن خوفنا
على مصر وبس
هنرجع تانى
بنمد إيدينا لأبعد نقطة جوانا
ونطلع أحلى ما فينا
ونطلع أطهر شىء جوانا
ونخرج حلم ما متش
وما فتش الوقت
الوقت بتاعنا
وبكرة بتاعنا
من غير طواغيت
وبدون فرعون
من غير كرباج
ولا مخبر نص الليل
من غير زنازين ملهاش أبواب
بكرة بتاعنا
راجعين لميدان الحرية
نتنفس هوا مفهوش أحقاد
ولا شغل عناد
نفتح شبابيك الحرية
شباك شباك
تتمكيج مصر وتتزين
نسهر وياها الليل كله
نهمس ف ودانها ونسألها
فرعون وهمان إيه فرعنهم؟
تضحك
تسخر
تنزل دموع الفرح
من عينها الجميلة
وتسيل على خدودها
يتأثر مكياجها الهادى
تسحر قلوب كل الميدان
وقعوا ف غرامها
بصت بطرف عنيها
كل الشباب اترمى
دراويش ف أحضانها
راجعين لميدان الحرية
نكتب بأسامى الشهدا حروف
ونكون جملة مفيدة
حرية وعيش وكرامة
يتهجى الطفل حروفها
ويلون كراسته بلونها
ويشم نسيمها الكهل
ويرفع رأسه
راجعين لميدان الحرية
نزرع ف قلوب أطفالنا الحلم
من غير أحلام هنموت
نقطف من غصن شبابنا
ربيع الثورة
من غير إصرار هنموت
راجعين لميدان الحرية