أحلام غلبان

هذه القصيده باللغه الدارجه المصريه
أرجو من جميع الأصدقاء قراءة حرف القاف
بالألف وأسأل الله عز وجل أن تعجبكم
-
-
تسمع فى كلامها براءه ورقّه
وحياء صاحى جوّه الوجدان
وتشوف فى عنيها مشوار بكره
وحلاوة الدنيا فى أحلى زمان
جميله وواقفه فى شبّاكها
وعيونها تطل على الدّكان
والناس كلّها بتقول ليّه
باين فى عنيك إنّك حيران
ماتروح لأبوها وأطلب إيدها
حبّك متْخَبّى وعايز إعلان
حبّى ياناس جوّه فى قلبى
وأنا طول الليل ويّاه سهران
دخل إزّاى وملك عقلى
إزّاى ياصحابى بلا إستئذان
راح أروح لأبوها أطلب إيدها
بنتك يالخال فى العين تنصان
شبْكتها عقدين لولى
وعقد دهب وسوار مرجان
ومهما يكون مهرها غالى
هاعطيه بسرور ويّا الفستان
وعندى فى بيتى شقّه كبيره
مفروشه محبّه وشوق وحنان
واخدْ ويّايه تورتايه وجاتوه
وعلبة توفى من الدّكان
أنا أصلى كريم وعزيزه نقسى
وعشْت فى بيتى من غير حرمان
والْبس جلّابه وعبايه سوده
وفى إيدى عصايه أبانوس على زان
وأرفع حاجب وأبرم شارب
وكلام من فوق وبطرف لسان
-
مالك يامّه بتهزّى فى كتفى
إصْحى ياواد روح الدّكان
-
كان حلم جميل يامّه سبينى
ونسيت فيه إننى غلبان
-
بس الحلم كتير خلّانى
أعرف نفسى إننى إنسان