هل توافق على التبرع بأعضائك

أحمد على طالب بكلية تكنولوجيا 19 سنة
موافق بشرط أن التبرع ده يكون لحد من قرايبى ويعنى لو اتبرعنا لمريض بكل الأعضاء اللى هو محتاجها ممكن برضه يموت علشان الأعمار دى بيد الله ومن ضمن الأشياء التى أختص بها ربنا نفسه ولو عملنا إيه مش هنغير فى حكم ربنا حاجة.
مصطفى سيف سرحان مدرس لغة إنجليزية 54 سنة
لا مش موافق طبعا على موضوع التبرع بالأعضاء سواء قبل الوفاة أو بعدها خاصة أن هناك العديد من الآراء المتضاربة حول هذا الموضوع وفيه أطباء وعلماء دين بيقولوا إنه حرام، وبعدين موضوع التبرع ده وراه بيزنس كبير قوى فى المستشفيات وفى المقابر يعنى المسألة مش محتاجة موافقة ولا رفض من المتوفى.
د. محمود عرابى أستاذ صيدلة بجامعة القاهرة 65 سنة
لا أمانع فى التبرع بالأعضاء بشرط أن تكون هذه الأعضاء التى سيتم التبرع بها صالحة للتبرع، خاصة إذا كانت ستساهم بالفعل فى إنقاذ حياة مريض، ولكنى لدى استفسار صغير أرجو أن تكتبوه لماذا علماء طب الأزهر أكثر تشدداً فى رفض هذا الموضوع بينما على العكس من شيوخ الأزهر أكثر تسامحا فيه؟
أمجد زكريا بكالوريوس خدمة اجتماعية 30 سنة
طبعا موافق على موضوع التبرع بالأعضاء بعد الوفاة، وشايف أنه موضوع كويس جداً والمفتى تقريبا أصدر فتوى بشرعية التبرع بالأعضاء وفيه آية فى «القران الكريم» تشير إلى هذا المعنى وأتمنى أن تتم التوعية الكافية بهذا الموضوع علشان فيه ناس كتير مش شايفه الجانب الإنسانى اللى فيه.
مهاب مصيلحى موظف خدمة عملاء 22 سنة
ممكن أوافق بشرط أن الموضوع مايبقاش تجارة وسبوبة وأنا شايف إن موضوع إباحة التبرع بالأعضاء بعد الوفاة ده ممكن يقضى ظاهرة نبش القبور أو جرائم سرقة الأعضاء فى المستشفيات والعيادات الخاصة علشان الأعضاء هتكون متوفرة زى موضوع التبرع بالدم بالضبط اللى قضى على ظاهرة بيع الدم اللى كانت منتشرة قبل كده.
عصام عصمت موظف بشركة سياحة 51 سنة
والله لو كان هذا التبرع حلال يبقى خير وبركة ويبقى مافيش مشكلة وفيه ثواب كبير، أما إذا كان حرام أكيد هاكون مش موافق عليه، وسمعت مؤخرا إن المفتى أباح هذا التبرع ولكن لسه فيه ناس بتقول إن هذه الفتوى أو إباحة التبرع بالأعضاء ده أمر مش مؤكد خاصة أنه لا توجد آية أو حديث بهذا المعنى.