اعتذار لرسول الله

فداك نفسى
ومالى وكل ما أملك
ولا أملك
ف دنيا الجهل ماليها
وحاكم كل ما فيها
ودايس ع البشر والأرض
وأصبح طولى زى العرض
ملامحى باهتة دبلانة
وأصلب طولى مش قادر
بتخبطنى رياح م الشرق
وتخبطنى رياخ م الغرب
أقوم من كرب أروح على كربلاء
فداك نفسى
ومالى وكل ما أملك
ولا أملك
وضعفى ف إيدى ولسانى
كلاب الأرض تهزمنى
وتسخر منى
توزنى مليش أوزان
ولما بموت مليش أكفان
بموت مرة ف عرض البحر
وموت مرة ف قطار محروق
وموت مرة ف طابور العيش
وموت مرة على الأسفلت
بجد اتهنت
وهانت نفسى ع الدنيا
مشارقها ومغاربها
فداك نفسى
ومالى وكل ما أملك
ولا أملك
تقبل اعتذار منى
وخجلى طوق ملازمنى
عشان فشلى أكون تلميذ
وأرفع راية العزة
وعشت سنين مليش لزمة
أنا اللى اتهنت
وداست حلمى ألف بيادة
وكالعادة ماتركت جرح
ودايماً قهوتى سادة
ف عز الفرح
تقبل اعتذار منى
وأشكو إليك مدى حيرتى
أنا حيران أصدق مين
أصدق ناس بتخدعنى باسم الدين
وساعة الجد تتلون كما التعابين
وتدفن راسها ف الرملة
يدوخ عقلى من الصدمة
تقبل اعتذار منى
أنا تلميذ لكن خايب
لا ذاكر دروس الأمس
ولا عارف يكون بكرة
على فكرة
أنا مش فرد أو مليون
أنا أمة
ولكن أمة مهزومة
ومنكوبة ومعطوبة
غثاء السيل
وسرقوا سيفها ودروعها
وتركوها ف عز البرد
عريانة
وسوق النخاسين سوقها
ولا تعرف طريق غير بابه
وأعتابه
وبتفاصل بكام ولمين
وسمسارها لبس عمة
وساعات لحية
وساعات ع الموضة
تقبل إعتذار منى
أنا تلميذ لكن فاشل
وبستورد رغيف العيش
من الأمريكى والهندى
وبتسول على باب الطلاينة
وبطلب من فرنسا معونة
وأكتر كلمة بستعملها
"غيثونا "
ومادد إيدى دايماً تحت
تقبل اعتذار منى
فداك نفسى
ومالى وكل ما أملك