كفايانا مستشارين !!

قولوا لمعالى الرئيس كفايانا مستشارين
اذا كنت عينتهم اللى هايدفع مين
لو كانوا فلحوا زمان كنا استشرناهم
وكان زمان مصرنا زى اليابان والصين
......
الشهداء كانوا اولى منهم ياخدوا الف وسام
هما اللى ضحوا وكانوا فى الصفوف قدام
وقدموا دمهم لاجل الوطن ينهض
والله بالشكل دا حتى المقارنه حرام
......
شويه كل شهيد ياخد قلادة النيل
ضحى بدمه ماكنش فى حب مصر بخيل
و( احمد حراره ) اصول ياخد عشر نياشين
وهب لمصر عنيه وقال دا لسه قليل
......
قولوا لمعالى الرئيس اخدوا الوسام على ايه ؟
ومرتب المستشار عند الرئيس قد ايه ؟
ومين هايدفع لهم مرتبات تانى ؟!
واذا كنت قعدتهم اُمال عايزهم ليه ؟
......
قولوا لمعالى الرئيس لسه الحساب مفتوح
والشعب بيقول كمان العفو مش مسموح
عايزين قصاص للولاد من رقبة الجانى
ويكون على المشنقه حتى طلوع الروح
......
قولوا لمعالى الرئيس الشعب فايض بيه
بعد نجاح ثورته مافيش وصايه عليه
ممنوع تجيب مستشار عاصر نظام فاشل
يا تقول لنا حضرتك الدوله خربت ليه ؟
......