بقفل ونقفلوا الجرنال

اذا كُنا زى زمان راح ندنوا فى مالطه
وهايمسكوا لكل صحفى حر على غلطه
وهيدبحوا كل يوم لصحاب القلام قطه
يبقى بلاها كتابة الرأى فى الجرانين
وفى كل جرنال يحطوا فيه لواء شرطه !!
...
اذا كان معالى الرئيس هيقول متنقدونيش
ومعالى شيخ الجماعه هيقول متنظروليش
دا غير بقيت الشيوخ والاخوه والالاضيش
يبقى مفيش غير بقفل ونقفلوا الجرنال
وكل صحفى يقف فى السوق بطاولة عيش
...
ونعلن ان البلد حاكمها ديكتاتور
عايز يطفى الكلام زيى ماطفى النور
عايز وطن كل صحفى فيه لابس طرطور
وكل جورنال شريف بكره هيتصادر
وهايفضل اللى هيبقى العبد للمأمور
...
ومدام هتبقى البلد اللى حاكمها دقون
والدقن فيه تحتها واحد مهوش مضمون
ممكن فى وقت اللزوم يعمل لنفسه قانون !
انا افضّل اروح افتح بتاع كشرى
ولما نفسى تقوم اعصر عليها لمون
...
وبلاش كمان الكلام على كافة القنوات
وخصوصا اللى بتنقد الرئيس بالذات
وبلاش كمان يظهروا على الشاشات ستات
وياريت كمان المذيع بالطرحه يتحجب
ويربى دقنه ويعمل شيخ من البهوات
...