جفف دموعك يا وطن

كتر الدموع مش راح يفيد
لملم جراحك وابتسم وافرح مع الفجر الجديد
لسه ولادك فى الميدان بالعزم اللى كان زمان
وكل واحد منهم ناوى يكون اول شهيد
...
جفف دموعك يا وطن لسه الطريق للنور طويل
نوّر شموعك كلها الدنيا لسه فيها ليل
وطريقنا فيه الشوك كتير لكن عليه لازم نسير
علشان مفيش لينا اختيار ولا فيه عن الاصرار بديل
...
جفف دموعك يا وطن وافتح عيونك للحياه
انا عارف ان الصبر عندك والالم جاوز مداه
عارف كمان انك كبير عارف كمان انك خطير
عارف كمان انك زمان حطمت أحلام الطغاة
...
جفف دموعك يا وطن الكلب مش هيكون اسد
ولا الأسود وسط الميدان ممكن تبيع دم الولد
اللى وقع بينهم شهيد وعنيه على الفجر الجديد
اللى منوّر بالامل طالع على كل البلد
جفف دموعك يا وطن ليل الالم مش راح يطول
والبرص مش هيكون اسد والجرز مش راح يبقى غول
لسه الدراع فينا عفى قادر على اللهو الخفى
هانهد أوكار الديابة والعصابة والفلول
...