لملم جراحك يا وطن

لسه طريقنا طويل
الجرح مش راح يدوم ما دُمت فيك الحيل
طول ما دراعك عفى وفيك جمال الروح
شمسك هاتطلع يوماتى فوق شطوط النيل
......
لملم جراحك وهات ايدك معايا وقوم
دا احنا انتصرنا يادوب فايت عليه كام يوم
لسه الصبايا يا دوب بيفرقوا الشربات
والشمس لسه هاتطلع بين ضباب وغيوم
......
لملم جراحك ولم زبالة الأيام
خلى طريقنا جميل لسه الأمل قدام
كوم الزباله كبير لكن ها نقضى عليه
ونعيش بقيت عمرنا فى نور وخير وسلام
......
مفيش فى زمن النضال حلاوة من غير نار
لازم تكون يا وطن وقت الآلام صبار
ياما اتجرحنا كتير ودوينا ياما جروح
ووقعنا ياما وقومنا نكمل المشوار
......
هانت وفاضل على بلوغ الأمل شبرين
واحنا كتبنا التاريخ بأيدينا من ساعتين
مدام استجاب القدر لإرادة الثوار
قوم يا وطن وابتسم وافرح مع الملايين
......
هز الهلال يا وطن واطلع لزمن النور
دار الزمان دورته واحنا علينا الدور
نفرح ونبنى ونعلا لفوق كمان وكمان
ونلبس اللى ظلمنا و زلنا طرطور
......