ميّت حياة‎

عمرك ما كنت ف يوم كليم
ترمى العصا بالمعجزات
وأنا قلبى مش ساحر قديم
ولا حتى فرعون أهرامات
ياواخدنى للبحر البعيد
البحر مش مشقوق هناك
والموج هلاك
غرقانة فيه الأمنيات
مع كل موجة فى حكايات
متكسرة فوق الصخور
فتافيت كلام
فتافيت قلوب
فتافيت شعاع
هربان وخايف م الغروب
لكنه كان هربان سكوت
من موت لموت
ومفيش نجاه
حتى اللى واقف من بعيد
ميّت حياة
مانتاش كليم ترمى العصا
تسعى وتبلغ كل شىء
ولا كنت يوم عمرك برىء
هربانة روحى من الزحام
فأخدتها لنفس الطريق
لكن خلاص دلوقت حان
وقت الخلاص
وكفرت بيك
إمضيلى صك العتق من حبك وروح
مسموح تروح
وانا قادرة اغير روحى واخرج للبراح
نص الجناح
قادر ياخدنى لاعلى نجمه فى السحاب
نص العذاب هرميه عليك
نص العذاب منك إليك
وانا يوم ماأحس بشوقى ليك
هفتح كتاب الجرح
وامشى ع الحروف
مع كل جملة مجمعة
حتما هشوف
موت الفراشة الطيبة
قلبى اللى عطشان طبطبة
خبيته بره الأمكنة والأزمنة
علشان ما يوم
تعتر فى ضله وتكسره
فزاعة الحلم القديم
مبقتش هى المشكلة
الحلم عاش
الحلم مات
العلم حسم المسألة
منتاش كليم
ولا فيه ف ايدك معجزات
أنت يا دوب تمثال حجر
يحكى على
جهل اللى فات