الرئيس السيسى من كاتدرائية ميلاد المسيح: حرصت على المشاركة بعيد الميلاد منذ 2015.. ويا رب يكون 2026 أفضل علينا.. ويؤكد: لن نسمح لأحد يضر بعلاقتنا.. كلنا واحد وده الرصيد اللى لازم نخلي بالنا منه

وجه السيد الرئيس عبد الفتاح السيسي، التهنئة إلى قداسة البابا تواضروس الثاني بمناسبة الاحتفال بعيد الميلاد المجيد.
وقال الرئيس عبد الفتاح السيسى، خلال مشاركته فى تقديم التهنئة للأخوة الأقباط بعيد الميلاد من داخل كاتدرائية ميلاد المسيح بالعاصمة الجديدة، إن حجم المحبة بين المصريين يزيد يوما بعد يوم منذ 2015.
وأضاف السيد الرئيس عبد الفتاح السيسي، خلال كلمته بكاتدرائية ميلاد المسيح بالعاصمة الجديدة: "أحمد ربنا أننا منذ عام 2015 وأحنا بنيجي نحتفل مع بعض بالعيد.. أهنئ قداسة البابا والكنيسة وأهنئ كل المواطنين أهلنا المسيحيين والمصريين وكل الناس اللى فى العالم.. كل سنة وأنتم طيبين".
وتابع السيد الرئيس عبد الفتاح السيسي، قائلا: "كل مرة بقول الكلمة دي، بقول لكم قداسة البابا له تقدير خاص واحترام كبير لشخصه العظيم ولكم كلكم وربنا يحفظكم ويحفظ بلدنا".
وأكد الرئيس السيسي: "مش عاوز أخد وقت قداسة البابا.. عام سعيد عليكم وعلينا كلنا وعلى الدنيا كلها ونقول يا رب إن 2026 يبقى عام بفضل الله أفضل علينا وعلى كل الدنيا"، موضحا أن قداسة البابا له مكانة عظيمة في قلبه واحترام كبير.
وأوضح الرئيس عبد الفتاح السيسى: "لن نسمح لأحد بأن يكون سببا في تضرر علاقتنا، عيد سعيد علينا كلنا.. وربنا يحفظنا ويجعل دائما أيامنا أعياد وأفراح.. اللهم أمين".
وأضاف الرئيس السيسي: "كنت بقول أنه فى عام 2015 أول مرة اتشرف بالزيارة دي.. واحتفل وأشوف المحبة اللى بينا.. وفى الفترة من 2015 لحد النهاردة حصل حاجات كتير وأحداث كتيرة وأيام صعبة كتير.. لكن كل مرة بقول الكلام ده.. دايما شعب مصر مع بعض.. كلنا بنحب بعض وبنخاف على بعض ونحترم بعض.. وعلاقتنا كشعب مصر يجب أن تكون بلا أي تمييز.. وتفضل العلاقة قوية ونطورها.. وهو ده الرصيد اللي لازم نخلي بالنا منه.. مفش أنتم وأحنا.. فيه أحنا.. كلنا واحد".
ووجه السيد الرئيس عبد الفتاح السيسي، نصيحة للشعب المصري قائلا: "بقول للمصريين أوعوا تقلقوا أبدا، بس بشرط، خليكم دايما مع بعض، واوعى حد يحاول أبدا يخلينا أبدا نختلف أو حتى نؤذي نفسنا وبلدنا، دي وصيتي ليكم، لينا كلنا".
وأضاف الرئيس السيسي، "أي مشكلة بفضل الله سبحانه وتعالى، بتتحل، بس تفضل مصر بخير وسلام وشعبها بخير وسلام".
وتابع الرئيس السيسي فى نهاية كلمته: "مرة تانية مش عاوز أطول عليكم، كل عام وأنتم بخير وسلام وسعادة وقداسة البابا بخير وسلام وسعادة، واحنا بنبقى فرحانين أوي واحنا موجودين معاكم، وربنا يفرحكم ديما ويفرح مصر والدنيا كلها، اللهم أمين.. كل سنة وأنتو طيبين، متشكر جدا".
ويترأس قداسة البابا تواضروس الثاني، بابا الإسكندرية وبطريرك الكرازة المرقسية، قداس عيد الميلاد مساء 6 يناير 2026، بمشاركة لفيف من أحبار الكنيسة، وسط حضور واسع من المصلين، في أجواء روحانية خاصة.
ومنذ افتتاحها رسميًا في يناير 2019 بحضور الرئيس عبد الفتاح السيسي، أصبحت الكاتدرائية مقرًا رئيسيًا للاحتفال ب عيد الميلاد، ووجهة سنوية تحمل رسائل واضحة عن التماسك الوطني والمواطنة دون تفرقة، خاصة مع حرص الرئيس على المشاركة في القداس وتقديم التهنئة للأقباط، في تقليد يعكس دعم الدولة لقيم التعايش.
وتُعد الكاتدرائية، الأكبر في الشرق الأوسط، تحفة معمارية تمزج بين الحداثة والطراز القبطي الأصيل، بما تحمله من قباب وأيقونات ورسوم دينية، لتتحول ليلة عيد الميلاد إلى رسالة مصرية للعالم عنوانها التسامح والسلام ووحدة النسيج الوطني.