ياسمين عبد العزيز: ولادى مش بيحبوا فيلم الدادة دودى لهذا السبب

كشفت الفنانة ياسمين عبد العزيز خلال استضافتها ببرنامج صاحبة السعادة مع إسعاد يونس على شاشة DMC، عن علاقتها بأبنائها بقولها: "بنتي صاحبتى بصورة كبيرة، ورغم إن الأطفال بيعشقوا فيلم الدادة دودى، ولكن الاتنين مش بيحبوا الفيلم ده، لسبب إن العيال في مشاهد كتير بيضربونى ويعملوا فيا مقالب، وبالتالي مش بيحبوا يتفرجوا على الفيلم ده نهائي".
هذا وحلت النجمة ياسمين عبد العزيز، ضيفة في برنامج "صاحبة السعادة" المذاع على قناة Dmc، الذي تقدمه الفنانة والإعلامية إسعاد يونس، وبسؤالها عن هل ممكن تتزوج مرة أخرى قالت ياسمين عبد العزيز: "أنا عامة طول عمرى متجوزة وعمرى ما كنت سينجل، واللى طول عمره متجوز ما بيعرفش يكون لوحده".
وأضافت ياسمين عبد العزيز: "من وأنا عندى 18 سنة وقت لما اتجوزت لغاية لما اتطلقت اتجوزت بعدها أحمد العوضي، فعمرى ما كنت سينجل، وأنا بحب الحب وما بعرفش أبقى لوحدى، بس أنا أعمل إيه في قلبى دلوقتى، وعامة ربنا مش بيعمل غير كل خير وأنا راضية".
وعن أسباب انفصالها عن أحمد العوضي قالت ياسمين عبد العزيز: "بعيد عن إن فيه سبب من الأسباب ما ينفعش نتكلم فيه، ومش خيانة أقسم بالله مش خيانة، عشان فيه ناس مؤذية كتير مش وراهم غير إنهم يأذونى".
وأضافت: "أنا مش هينفع أتكلم في تفاصيل والناس حبانا مع بعض وفيه ناس حقودين وبيوقعوا لأنهم ما يعرفوش يعنى إيه حب، وجواهم كره".
وتابعت: "أنا بسيب الحاجة على ربنا واللى عايزه يمشيني في أي سكة أنا بكون راضية حتى لو مش على رغبتى".
وتحدثت ياسمين عبد العزيز عن علاقتها بالفنان أحمد العوضي قائلة: "أنا مع أحمد لما حبيته اكتشفت إن أنا ما كنتش بحب قبل كده".
وأضافت ياسمين عبد العزيز: "يعنى الحب اللى قبل كده أنا ما حبيتش، وإن أحمد أول حب في حياتى وهو الحب الحقيقى".
وعن علاقتها بالفنان أحمد العوضي قالت ياسمين عبد العزيز باكية: "أنا مش بحب أحمد أنا بعشقه"، لتعاتب إسعاد يونس: انتى جايبانى عشان أعيط وبتضحكى عليا بحاجات بتوجعنى ومش عارفة أنا بقيت رقيقة كده ليه ما كنتش كده والله".
وكان آخر أعمال ياسمين عبد العزيز الفنية مسلسل "ضرب نار" الذى تم عرضه فى شهر رمضان قبل الماضى 2023، والعمل من تأليف ناصر عبد الرحمن وإخراج مصطفى فكرى وإنتاج شركة سينرجى وبطولة ياسمين عبد العزيز، أحمد العوضى، ماجد المصرى، هدى الإتربى، سهير المرشدى، دنيا المصرى، إسراء رخا، أحمد غزى، إيمان السيد، بدرية طلبة، أحمد عبد الله، زينة منصور، تيسير عبد العزيز، تامر مجدى وآخرين.