الشيخ علي جمعة: التواصل مع الجن حرام واللى يستجيب منهم للإنسان وقعته سودا

قال الشيخ على جمعة مفتى الديار السابق وعضو هيئة العلماء بالأزهر الشريف، أن الله سبحانه وتعالى خلق الجن من أجل العبادة، متابعا: "طب لو جيت عرفت طرق اشتغل عليها اسمها استجلاب الجن.. طرق كده اشتغل بيها بحيث يتم التواصل مع الجن والكلام معهم وده ممكن لكن مش ممكن اشوفهم على شكلهم.. ولو قولت للجن عاوز 100 ألف جنيه خلاص.. وعاوزين نشترى عربية هات لى 100 ألف جنيه ويروح يسرق الفلوس ويجبها".
وأضاف خلال برنامج "نور الدين" الذى يقدمه على قنوات المتحدة خلال شهر رمضان: "ده حرام لأنه أخرجت الجن من الخلقة بتاعته وهى العبادة.. زى ما الشيطان يوسوس لى، أنا كده وسوست له.. والجن فى الحالة دى نسى نفسه واتبع الأذى اللى بعمله.. ربنا خلقنا ومش بنشوفهم حتى لا نشوش بعضنا على بعض.. والجن يأثم إذا تدخل فى حياة البشر والعكس".
وتابع الدكتور على جمعة: "اللى يحط فى دماغه الاتصال بالجن ويفعل هذه الأمور فإنه يكون قد خرج عن حد الحلال وارتكب جريمة ولو الجن طوعنى يبقى وقعته سودا.. وأن كان صالحا لا يطاوع البشر.. والاستعانة بالجن حرام حتى لو فى حاجات كويسة برضه حرام.. لأن الغاية لا تبرر الوسيلة ربنا أمرنا بعدم الاتصال بالجن ولو اتصلت يبقى عملت حرام ومش قولنا انت اتصلت بيه ليه.. التواصل مع الجن حرام وهو مكلف بعبادة الله.. والدين الإسلامى فصلت بين الإنسان والجن.. أنت فى حالك وأنا فى حالي.. ولكن أيام سيدنا سليمان سخر الله له الجن وكلفهم أن يصنعون لهم ما يأمرهم به.. قبل سيدنا محمد وضع وبعد سيدنا محمد وضع تاني".
ويعد برنامج "نور الدين"، الذى يعرض على قنوات المتحدة خلال شهر رمضان للدكتور على جمعة، مفتى الجمهورية السابق، أحد أهم برامج الشركة المتحدة، والذى يظهر الأسئلة للمرة الأولى على لسان أطفال صغار، دومًا ما يسألونها لأهاليهم الذين يجدون أنفسهم فى حيرة، من أمثلة فين ربنا، مش بنشوفه ليه، وغيرها من الأمور الذى يقف الآباء أمامها فى حيرة شديدة دون إجابة ما جعل البرنامج محل ترقب سواء للأهالى الذين ينتظرونه لفهم الإجابة الصحيحة، أو الأبناء الذين سيجدون فى البرنامج فهمًا لما يحاولوا معرفته ويثبتهم بصورة صحيحة ما يبنى عندهم وعيًا ويقينًا.