آسر ياسين: مصطفى درويش كان ابن بلد وجدع.. وعمرو سلامة: اتوفى فى نص الفيلم

حل أبطال فيلم "شماريخ" ضيوفاً في برنامج "معكم منى الشاذلي، الذى تقدمه الإعلامية منى الشاذلي على قناة ON، وتحدث عمرو سلامة على وجود الأطفال في أعماله، قائلاً: "أنا قررت إنى مش هعمل أفلام فيها أطفال لأنه شيء صعب جدا، ومن أول فيلم عملته وبطله طفل ومن وقتها قررت مخلفش، لأنى كنت بتعامل مع 300 طفل، فحاسس إنى أخدت جرعتى مع الأطفال من وقتها لأن أنا بحب أى طفل لمدة نص ساعة بس تقريبا، ومش بعرف اتعامل معاه إنه طفل ولكن بتعامل معاه إنه حد كبير".
وتابع عمرو سلامة: "في فيلم شماريخ كنت مصمم إن ميبقاش في أطفال، ولكن أنا بكتب حسيت شخصية آسر معندهوش لحظة يبتسم أو يكون في شق معين يبينه، وحسيت إن في مشهد طفل معاه هيبين الجزء ده لإنه طول الوقت بيتعامل مع جرائم".
وعن مصطفى درويش قال آسر ياسين: "اتعرفنا على بعض في مسلسل ب 100 وش، وعلى آخر المسلسل بقينا أصحاب جدا، وحتى لما خلصنا تصوير كنا بنسأل على بعض، واتوطدت علاقتنا ببعض وقعدتنا كانت أخوية، وهو ابن بلد وجدع جدا".
واستكمل عمرو سلامة: "وفاة مصطفى درويش كانت في نص الفيلم، وأنا كنت وقتها في معاينة تصوير وكان هو كاتبلى قبل وفاته تعليق على منشور عندى وملحقتش أرد عليه، ولقيت تليفون جالى بوفاته وقعدت شوية على ما استوعبت الخبر، فكان الموضوع مرعب جدا".
وأضاف عمرو سلامة: "مشاركة مصطفي درويش كان ترشيح من آسر ياسين ولما عرضنا عليه الدور، اتكلمت معاه أكتر وعرفت كتير عن حياته وأسرته، ولما دخلنا تصوير الفيلم لقيت كيميا جميلة بين آسر ومصطفى".
وأشار عمرو سلامة إلى أن مصطفى درويش كان متبقى له مشاهد تصوير وظل أسبوعين أو ثلاثة لم يستطع أن يفكر في الفيلم لعدم تصديقه ما حدث من الناحية الإنسانية، وقام بعد ذلك بتغييرات في مشاهد وحلينا المشكلة بحيل رهيبة عشان الفيلم مايفعش منه حاجة، ومكنتش عاوز أشيل مشاهد له من الفيلم عشان يفضل مصطفى موجود على قد ما أقدر تكريما له".
فيلم "شماريخ" بطولة آسر ياسين أمينة خليل، خالد الصاوي، آدم الشرقاوي، مصطفى درويش، وسالي حماد، وعدد من ضيوف الشرف منهم محمد ثروت وهدى المفتي، والعمل من تأليف وإخراج عمرو سلامة، تدور أحداثه في إطار أكشن ومطاردات، حيث يحدث ظرف ما يجمع بطلى الفيلم ويجعلهم في خطر كبير فيتحدون لكيفية التخلص منه.