أنا انهزمت يا رجالة

حاسس بهزيمة نفسية كبيرة إحساس واحد واقف فى السوق وسط الناس خد قلم على قفاه على سهوة . مش مهم وجع القلم ممكن أتحمله وأتحمل أكتر منه – أنا شديد – المهم الفضيحة والجُرسة . المهم كسرة النِفس .
المهم إن فيه ناس كانوا واقفين ورايا كنت فاكرهم رجالة صُح . كنت فاكر إن فيه ناس مؤتمنة على كرامتى هما أول ناس أهانوها كنت فاكرهم بيحمونى طلعوا بيعروا قفايا علشان انضرب كويس والقلم يطرقع .
الموضوع لا علاقة له بمباريات الكورة والهزيمة واحد صفر ولا علاقة له بى شخصيا ولا علاقة له بعبارات إنشائية مثل دماء الشهداء اللى روت أرضنا الطيبة الطاهرة وهى لا طيبة ولا طاهرة ولا حاجة مادام بيطلع منها أجسام بهذا الوهن وهذا الخبث . اللهم إلا إنهم من أرض تانية وضحكوا علينا مرتين مرة لما قالوا إنهم مننا ومرة لما قالوا إنهم بيحمونا وباقين على العهد.
والموضوع لا علاقة له بروح الثورة ولا بروحى إللى طلعت من كتر الضحك على الدقون. الموضوع له علاقة بغير مؤتمن على مصلحة وطن ولا على كرامته . الموضوع له علاقة بناس بيقولوا إننا فاهمين كل حاجة وعارفين كل حاجة بس ما بنقولش لأن الغوغاء ما يصحش يفهموا . وكل حاجة هنا على رأى سعيد صالح " حكيمة يعنى " بتدى حقن . فى مين ؟ مش عارف.
عشمتونا بالحلق وخرمنا ودانا التى هى متخرمة أصلا وقلنا أزلام – رجالة يعنى – وقالت الصحف التى هى مطلعة إنه تم ضبط خرايط تقسيم مصر فى هذه المكاتب يا راجل . ويرسى الموضوع فى الآخر على إن المشكلة غير قانونية وتطلع المكاتب غير مرخص بيها وبس .
رقاصة وبترقص . يعنى هى كانت هتقسم مصر وتسلمها تسليم مفتاح بالقانون ؟!!! . يا راجل ده نص مصر غير مرخصة عربيات نقل غير مرخصة ومحلات بقالة غير مرخصة وتلات أرباع المقاولين فى مصر غير مرخصين .سيناء كلها ببدوها والعرب فى الصحراء الشرقية غير مرخصين لا رقم قومى ولا دياوله والأنكت إن المكاتب غير المرخصة إياها كانت بتتعامل مع مكتب محاماة صاحبه كان وكيل نيابة سابق ووالده مستشار وقاضى ورئيس محكمة - اللهم صل على النبى - والراجل لا اعترض ولا سابهم وكمل المسيرة.
وايه المانع إن الغير قانونى يبقى قانونى واللى مش مترخص يترخص . الموضوع أخطر بكتير الموضوع قضية خيانة أمانة واختراق للمجتمع المصرى . بدليل إن – ماما أمريكا – سارعت بقرصنة مواطنيها بطائرة عسكرية وفى لحظات كانوا خارج البلد - شايف ياحسين بيطلعوا لنا لسانهم إزاى - واستكمالا لذر الرماد فى العيون التى هى عيوننا ادونا شوية فلوس . وقطر والسعودية والإمارات الكل كليلة إدفع وإملا حنكهم علشان الناس تسكت . مش هانسكت . أما بالنسبة للمجلس العسكرى بصراحة مش عارف أقول إيه ؟ قولوا إنتم.
نصيحة كل واحد يخللى بالوا من قفاه.