تخاريف موكوس

أيون أنا الموكوس و أنا اللى بخرف كمان، موكوس علشان سايب الدنيا و اللى فيها وقاعد بكتب، هى يعنى الكتابة هتجيبلى عربية، بخرف علشان عندى أحلام كتير فى زمن حرام فى الأحلام، لازم تعيش حياة مملة أو مش لازم تعيش أصلا .
موكوس علشان افتكرت أنى عملت ثورة ومبقتش عارف اذا كانت فعلا ثورة ولا تمهيد للثورة ولا بشتغل نفسى ولا ايه بالظبط!!
أنا الموكوس علشان صدقت العبارة المشهورة " الجيش حمى الثورة " و من ساعتها وأنا شايف الجيش بيقتل شباب كتير من سنى بس أحسن منى، طب ليه يموتوا ؟ سؤال يستحق الاجابة .
أنا اللى بخرف علشان مش مقتنع بجملة " الاسلام هو الحل " و لو افترضت ان كلامهم صح ، أغلبية أعضاء البرلمان تابعين لتيارات الإسلام السياسى، بقالهم شهر محلوش مشاكل البلد ليه !!!
أنا الموكوس علشان مبفكرش فى نفسى وعندى استعداد أموت علشان غيرى يعيش أحسن ، مع أن الكل بيحاول يستفيد من الوضع القائم لحسابه ، واحد يبحث عن امارة وواحد يبحث عن قصر منيف، ده غير اللى بيتاجروا بدم الشهداء والافظع من كده اللى بيتاجر بالدين، هل وصلنا لدرجة ان واحد يبيع دينه علشان جاه أو مال !
أنا فعلا موكوس و بخرف !
بس رغم اللى أنا فيه من ضياع و احباط و بسم الله ما شاء الله الدنيا قدامى ضباب فى ضباب ، بس أنا أغنى واحد فى الدنيا دى، أتحدى أكبر قائد فى البلد أنه يقدر يمشى فى الشارع لوحده زيى كده و يعمل كل اللى فى نفسه !
هو أنهى الاحسن أن الانسان يعيش فى قفص من ذهب ولا ينعم بالحرية؟
هو أنهى الاحسن أن الانسان يملك ملايين ولا يملك احترامه لذاته؟
هو أنهى الاحسن أن الانسان يتاجر بدينه ولا يقابل ربه بضمير سليم ونية صافية؟
جملة مكنتش أحب فى يوم أنى أكتبها بس للاسف الواقع بيفرض علينا حاجات أصعب من أننا نقدر نتخيلها .
" احترس! الثورة ترجع الى الخلف ."
اعذرونى ما أنا قلتلكم أنا موكوس و بخرف !!!