تخاريف ثورجية

حلمت أنى ركبت طيارة نزلتنى على كوكب غريب
فى دخان أبيض طالع منه وبجد مريب
ملطخ بالدم والدم متجلط
أصلهم بيقولوا إنه قاعد سنة ومبلط
كوكب حكامه بيقتلوا الشعب
والدم مش بس واصل للركب ده للكعب
مستعدين يضحوا بكل حاجة فى سبيل المال والكرسى
مش فارقة معاهم إن كنت محمد ولا مرسى
آه فى هناك ناس بتنادى حرية
يااه هما بيقتلوهم عشان عاوزين يخلصوا من العيشة دى ؟!
تخيل إنهم عروا البنات
يالهوى دول بيدوسوا عليهم بالمدرعات
ايدين الثوار مربوطة فى الكلبشات
طب هو ربنا مش بييجى على بالهم؟
ولا السلطة نستهم حالهم؟
يعنى إزاى شعب بيقتل فى بعض
دى الدنيا دوارة ومالناش غير بعض
هما الحكام جرالهم إيه؟
هو يوم القيامة قرب ولا فيه إيه؟
دول بينشنوا على عينيهم
خلاص من الانتقام بقى ماليهم!
لقيتهم بيسحبوا جثة جنب الزبالة
دى قلوبهم من العمى مليانة
الحمد لله فقت من الحلم قصدى الكابوس
فقت على ضوء تقريبا كده ضوء فانوس
جاى من شارع كله ضلمة!!
بيقول الحرية ظهرت يا ظلمة