ليلة غبرة

إمبارح بس سألتنى المدام!!
يعنى إيه ف السياسة كلمة نظام؟
وإيه علاقته بسعرالبطاطس
وجوز الحمام؟
وإمتى وازاى يبقى ف نظرنا
شهم وهمام؟
قلت ف عقل بالى
ياليلة سودا متعاصة سخام!
مالك يا غالية وكلام اللئام
خلينا ف الطورشى وكفاية ملام
عموما ياستى وخللى بالك م الكلام
النظام دا معنى غالى
غايب عن عقل العوام
يطبقه الطير ف السما
وكل أنواع الهوام
أما البشر
النظام عندهم صعب المنال
زى طير ف السما عالى المقام
حاله كده.. زى ما يكون انسجام
بين رغيف العيش وصحن الإدام
يتهيأ لى برضه
إنه حاله م الوئام
بين حبيبنا الحاج عطوة
جوا حشد م العظام
لجل يكسب ف النهاية
قرص جِلة يشوى بيه حمام
ولاّ أخونا عم لمعى
لما مات وسط الزحام
كان مراده لقمة حاف
تملا جوفه وبعدين ينام
يا ولية لازم تفهمى معنى النظام
إمتى الهمام من نومه يصحى
وإمتى ف سريره يعرف ينام
لازم وحتما تطبقى ف بيتك نظام
السراير والمراتب
اغسليها م السخام
هزت ف رأسها.. قال يعنى كله تمام!
قالت خلاص.. بالمناسبة السعيده دى
قايمة أطبخ لك شوربة عظام
والولاد لما يصحوا
أشوى لهم جوزين نظام
هزيت دماغى واترسمت
قال يعنى فهمتها معنى النظام