فى العيد الأول للثورة

عدت سنة والجرح غاير
ينزف كما أول نهار اتفتح
وكأنه رافض يندمل
من قبل حلمه ما يكتمل
عدت سنة والرصاصة لسة مجهولة
ودمى أصبح مستباح واليد مغلولة
وراهنوا على يأسنا ومسيرها محلولة
لسة الرصاصة ف صدرى بتدوى
خلطت ما بين النهار والليل
ما عرفت صاحبى من عدوى
عدت سنة والقهر هو القهر
والشهر تلو الشهر وأنا ناسى
البندقية ف صدرى والسجان على راسى
أشرف ما فينا اتهان
واتعرى ع الأسفلت
عدت سنة والحال كما هو
والبوم معشش فى الجسد جوة
مين اللى قال ثورتنا منورة بيته
كداب فى أصل الوش
ثورتنا طافية كما قنديل فقد زيته
عدت سنة والصورة ضبابية
وطريقنا دوار جحا
سرداب ورا سرداب
ومتاهة جوة متاهة وأنا أعمى
أبواب ومتشمعة والشمع أحمر
أحمر بلون الدم ع الأسفلت
عدت سنة والثورة متهانة
وصوتها أصبح ضعيف
وف ليلها بردانة
والاتهام بالجملة للثوار
واللى باعوا الوطن
جوة طرة أحرار
عدت سنة واحنا كما إحنا
واقفين محلك سر
من محنة إلى محنة
واللعب ع المكشوف والخداع ف الوش
فاضلى ايه يا وطن
غير الغبار والقش