خالد الحلفاوى لCBC: "شربت الدراما من أمى.. وعملت بالإخراج 13 عاما"

قال المخرج خالد الحلفاوي، إنه قام بالعمل كمخرج لأكثر من 13 عاما، وفيها تدرج بالمجال، وبعد تلك الفترة وصل لمرحلة تشبع، «مفيش مشكلة متعرضتش ليها، وكأني قفلت اللعبة دي، قولت لنفسي أني مأخرجتش السنة اللي جايه هشوف حاجة تانية، وفعلا جالي مسلسل تصويره في دبي وكان دراميا».

وأضاف الحلفاوي، خلال استضافته ببرنامج «في المساء مع قصواء»، والذي تقدمه الإعلامية قصواء الخلالي، والمذاع على فضائية CBC، أنه وفي بداية عمله بالإخراج كان دائما ما يطلب رأي والده الفنان الكبير نبيل الحلفاوي، ولكن وبعد فترة من عمله بات أكثر جرأة وقوة في اختيار الأعمال الدرامية أو الأفلام التي سيقوم بإخراجها.

وتابع: "أنا شربت الدراما من أمي فردوس عبد الحميد، لأني وأنا صغير كانت أعمالها أكتر وكنت بشوف حاجات أستاذ محمد فاضل الجميلة، وده اللي كبرت عليها واشتغلت مع الأستاذ فاضل وأنا مساعد واتعلمت منه كتير، وجوه البيت كتعامل مكنتش بتكلم في الحاجات دي خالص ولا منتبه للمجال".

وأوضح، أن مساعد المخرج بها الكثير من التخصصات التي يمر بها المخرج قبل أن يكون كذلك، وفيها يتلقي الكثير من المخزون المعلوماتي التي يجب أن تكون لدى كافة المخرجين.

وقال المخرج خالد الحلفاوي، إن مسلسله الجديد الذي سيجري عرضه في رمضان 2022 «مكتوب عليا» هو من بطولة الفنان أكرم حسني وأيتن عامر وعمرو عبدالجليل وهنادي مهنى وإسماعيل فرغلي وأحمد طعيمة، متابعا "أكرم حسني الشغل معاه بيطمني وبحس أني مش لوحدي، والإخراج مهنة فيها وحدة لأني اللي بقدر وبقرر وأتحمل نتيجه ده، ولما بشتغل مع أكرم بحس أن فيه حد في كتفي".

وأضاف، أنه بسبب تجاربه السابقة لا يقوم بالتوقع تجاه الأفلام أو المسلسلات التي يقوم بإخراجها، "رأيي أن أحنا بذلين مجهود والقصة تستاهل تتشاف وكل الناس اللي اشتغلت كانت بتشتغل بحب، وأتمني أنه يظهر في العمل لأني هزعل لو مظهرش".

وواصل: أنا أكتر فيلم عملته وبحبه هو كدبة كل يوم وكان عمرو يوسف ودينا الشربيني ومحمد ممدوح، ومحققش النجاح الجماهيري في السينما لأنهم مكنوش نجوم زي دلوقتي، ولما اتعرض على التلفزيون شوفت رد فعل بسطني وفكرني أني كنت صح أني أعمل العمل ده، وفرحت أول ما عملته».