والدة سفاح الإسماعيلية فى تحقيقات النيابة: خرجته من المصحة علشان الفلوس

ينشر "اليوم السابع"، نص تحقيقات النيابة العامة، مع "أمل .ع"، 50 عامًا، ربة منزل والدة عبد الرحمن نظمى، الشهير بعبد الرحمن دبور، المتهم في حادثة مذبحة الإسماعيلية، والتي من المقرر أن تصدر محكمة جنايات الإسماعيلية أول، برئاسة المستشار أشرف محمد على حسين، وعضوية المستشارين ولاء وجدي طاهر، وياسر حسنى مدبولي، وأحمد سرى الجمل، وسكرتارية هيثم عمران، حكمها اليوم الخميس، في ثالث جلسات محاكمته بقتل مواطن ذبحًا عمدًا، والشروع في قتل اثنين آخرين وسط الشارع بالإسماعيلية.
وقالت والدة سفاح الإسماعيلية، خلال تحقيقات النيابة، أنها لا تعرف المجنى عليه ولا توجد أي صلة معرفة بينهم، كما أكدت أنه لم يحدث أي مشكلة من قبل ما بين نجلها المتهم في الحادث والمجنى عليه، مضيفة في تحقيقات النيابة العامة، أن نجلها كان أدمن تعاطى المخدرات، وقامت بإيداعه إحدى مصحات علاج الإدمان بطريق "الإسماعيلية - السويس"، وخرجته بعدها لعدم قدرتها على دفع مصاريف إيداعه فى المصحة.
وجاءت نص التحقيقات كتالى:
س: ما صلتك بالمتهم عبد الرحمن نظمى محمد؟
ج: ابنى
س:ما معلوماتك بشأن الواقعة محل التحقيق؟
ج: اللي حصل أن يوم الإثنين 1\11\2021، الساعة حوالى 3 العصر، أنا كنت قاعدة في البيت، وابني عبد الله، جه قالي إن فيه واحد في السوق، قاله إن عبد الرحمن بيتخانق وشكله موت واحد، فأنا خوفت، بس بعدها ابني عبد الله هداني، وقالي إن الراجل المضروب في المستشفى، وأنا معرفش إيه اللي حصل، وسمعت إن فيه فيديوهات منتشرة، بس مشوفتش منها حاجة.
س: متى وأين حدث ذلك؟
ج: الكلام ده حصل يوم 1\11\2021، حوالى الساعة 3 مساءً، في بيتى اللى في حى العبور.
س: وهل شاهدت الواقعة محل التحقيق حال حدوثها؟
ج: لا أنا مشوفتش حاجة، ومعرفش إيه اللى حصل.
س: وهل ثمة علاقة أو خلافات بينك وبين المجني عليه المتوفي أحمد محمد صديق؟
ج: لا أنا معرفوش.
س: ما طبيعة علاقة نجلك بالمجني عليه المتوفى؟ وهل من خلافات بينهما؟
ج: لا أنا معرفش أن فيه أي حاجة بينهم، واللي نعرفه أن أخوه عصام، وأخ تاني اسمه حسن، واللي أعرفه أن ابني عبد الرحمن، كان بيتعامل معاهم في شغل من زمان.
س: هل من خلافات بين نجلك المتهم وبين شقيقي المجنى عليه؟
ج: لا عمرى ماشوفت مشكلة بينهم.
س: وهل يتعاطي نجلك ثمة مواد مخدرة؟
ج: أيوة هو كان بيشرب مخدرات، وأنا وديته مصحة من حوالي سنة، للعلاج من المخدرات اللي بيشربها.
س: وما المادة المخدرة التى يتعاطاها نجلك تحديدًا؟
ج: أنا معرفش هو بيشرب إيه بالظبط.
س:وكيف وقفت على تعاطي نجلك للمواد المخدرة إذًا؟
ج:لأنه كان طول عمره طيب وهادي، وبعدين ابتدى يبقى عصبي، والناس وأخواته كانوا بيقولوا إنه بيشرب مخدرات، ومحتاج يتعالج، وعشان كده أنا قولت أوديه مصحه وألحقه.
س: وهل أبصرت ثمة شواهد تشير إلى تعاطي نجلك المواد المخدرة؟
ج: لا لاحظت تغير في سلوكه، بس أنه بقي عصبي أكتر.
س: وما هو اسم الممكان العلاجى الذى أودعت به نجلك إنذاك وأين يقع تحديدًا؟
ج: أنا مش فاكرة أسمها لكن هي عند كوبرى سيناء في أبو بلح مركز الإسماعيلية
س: ومتي تحديدًا أودعت نجلك بذلك المكان؟
ج:من حوالي سنة أو أكتر.
س: كم المدة التى مكثها نجلك بذلك المكان؟
ج: هو قعد جوه شهرين ونصف.
س: هل استكمل نجلك علاجه بذلك المكان؟
ج: لا إحنا خرجناه، عشان مكانش معايا فلوس، ولما خرج كان كويس.
س: وما الذى أفادك به القائمين على إدارة تلك المكان بحالة نجلك تحديدًا؟
ج:هما مكانوش بيفهمونى أي تفاصيل عن حالته وكانوا على طول بيطمنونى أنه يبقى كويس بس.
س: ما هي حالة نجلك عقب خروجه من ذلك المكان، وحتى تاريخ ارتكاب الواقعة محل التحقيق؟
ج: هو لما خرج كانت حالته كويسة جدًا، وفضل كويس لمدة 10 شهور تقريبًأ، ومن حوالي شهرين فاتوا، ابتدى يتغير، وابتدى يتحول، وأنا مكنتش فاهمة هو ماله.
س: وما هي مظاهر التغير التي لاحظتيها على نجلك مؤخرًا، ومنذ حوالي شهرين على حد قولك؟
ج: هو كان بيزعق جامد، ومرة وقف في نص الشارع، وقعد يزعق بيقول قرآن بصوت عالي، وكان بيتكلم كلام مش مفهوم في أوقات كتير، زي مثلا أنه مرة قالي شكلك ساحرة، ومرة يقول اقفلوا الباب عشان فيه ناس جايه تموتكم، ومرة تانية قلع التيشيرت بتاعه في نص شارع العشرين، وحد منعرفهوش جابه البيت وكان بيعانى من هلاوس وبيشوف حاجات مش موجودة وكان بيكلم نفسه في أحيان أخرى.
س: وما التصرف الذي بدر منك إثر التغير فى حالة نجلك؟
ج: إحنا جبناله شيخ، ولما شافه قال له عليه جن وهربوا بس عبد الرحمن قال إن الشيخ ده مش فاهم حاجة، ومتجبيهوش تاني.
س: وهل ثمة تصرفات أو أفعال عدائية بدرت من نجلك تجاهك أو تجاه ثمة أحد؟
ج: لا مشوفتش أي حاجة منه زى كدا غير العصبية والزعيق بس.
س: ما قولك فيما قرره نجلك المتهم بالتحقيقات من إقراره بارتكاب الواقعة محل التحقيق، واعتياده ممارسة الفحشاء مع المجني عليه، وأنه ارتكب الواقعة لتهديد المجنى عليه له بفضح أمره وإفشاء ذلك الأمر؟
ج:الكلام ده مش صحيح، وعمر ابني ما يعمل حاجة زى كده، وهو بيقول أى كلام.
س: ما قولك فيما قرره الشهود أن المتهم حال ارتكابه الواقعة محل التحقيق كان يردد "ده اغتصب أمى وأختي"؟
ج: الكلام ده محصلش، وهو بيهلوس وبيقول أي كلام وربنا اللى يعلم بحاله.
-
س: متى تحديدًا كانت أخر مرة شاهدتي فيها نجلك قبل الواقعة محل التحقيق؟
ج: أنا شوفته وهو نازل من البيت يوم الإثنين 2\11\2021، الساعة 9 الصبح.
س: وإلى أين توجه نجلك آنذاك؟
ج: هو قال إنه نازل يدور على شغل.
س: وهل من ثمة أمتعة أو متعلقات أو أسلحة كانت بحوزة نجلك أنذاك؟
ج: أنا مشوفتوش شايل حاجة أو معاه حاجة.
س: وهل طلبتى من نجلك شراء ثمة سكاكين لاستخدامك المنزلى؟
ج: أنا ما طلبتش من حاجة زى كدا.
س: وما قولك فيما قرره نجلك بالتحقيقات بأنه تحصل على الأسلحة البيضاء المضبوطة بحوزته بناء على طلبك لاستخدامها في الأغراض المنزلية من تقطيع اللحوم؟
ج:لا الكلام دا محصلش.
وتم عرض المقطع الفيديو الخاص بالجريمة على والدة المتهم، وتم سؤالها ما قولك في المقطع السالف عرضه عليكى؟
ج: أيوه هو ده ابنى بس أنا معرفشى هو جاب الشنطة والسكاكين دى من فين.
س: وما قولك في مكواة الشعر المعروضة عليكى؟
ج: أيوه المكوة دى أنا شفتها في أوضة عبد الرحمن قبل كدا.
س: وهل سألتى نجلك المتهم عن سبب تواجد تلك المكواة.
ج: لا هو علشان بيجيب خردة كتير يحطها في أوضته ومسألتوش عن المكوة دى.

نص أقوال والدة السفاح أمام النيابة (1)

نص أقوال والدة السفاح أمام النيابة

نص أقوال والدة السفاح أمام النيابة (3)