حلت النجمة نيللى كريم ضيفة في برنامج "يوم ليك" للإعلامية سمر يسرى، المذاع على قناة الحياة، وقالت عن رأيها في نظرة المجتمع للفناين: "أنا بشوف نظرة المجتمع محترمة أو دى النظرة اللى بشوفها، ولما بشوف تعليقات سخيفة على إنستجرام بلاقى التعليقات الكويسة أكتر بكتير". وعن خوضها تجربة الباليه والمهرجانات الشعبية أيضا قالت: "أنا بحب كل حاجة لها علاقة بالفن وعلى كل المستويات سواء رقص أو تمثيل أو غناء، ليا ذكريات حلوة في الأوبرا وساعات بندم إنى مكملتش في الأوبرا لأن المسرح له رونق خاص، وأنا كنت برقص باليه كنت عادى بسمع أغانى عدوية دى حاجة ودى حاجة". وعن تاثير العمل على حياتها الخاصة قالت: "الشغل جزء منى ومن كيانى وشخصيتى، ولو قصرت في حاجة هاكون قصرت مع ولادى إنى مقعدتش معاهم فترة كافية، ولكن أنا لم أقصر مع أي شخص تزوجته، ولو رجع بيا الزمن عمرى ما كنت هاضحى بشغلى وكيانى لأن كل حاجة أثرت فيا". وعن علاقتها بطليقها قالت نيللى كريم: "احنا علاقتنا كويسة وبينا بنتين، واحدة عندها 13 سنة والتانية عنده 9 سنوات، ومحبش حد منهم يسمع انى أقول كلمة وحشة على والدهم ولا هو يقول كلمة وحشة على والدتهم، حتى لو في مشاكل بيننا لازم الواحد ميتكلمش عنها. وعن نصيحته لابنتها عندما تكبر وتفكر في الزواج قالت نيللى كريم: "هانصحها إنها تهتم بنفسها وبكيانها وتخلى بالها من نفسها ولما تلاقى الشخص المناسب تبقى تتجوزه ولكن الأهم إنها تسعد نفسها وإنه يضيف لها مش ينقص منها، ولكن لو على الحب فالحب بعدين لكن لازم أحب نفسى الأول وفى بنات كتير بتتجوز وهى معندهاش كيان ومش عارفة هي عاوزة إيه، ولازم كل واحدة تهتم بمستقبلها ولو عاوز تقعد في البيت تقعد برغبتها ولكن محدش يجبرها".
