"وش الميدان" قصيدة للشاعر سعيد حامد شحاتة

مصر اللى بتقرر
مصر اللى بتفسّر وبتبرّر
مصر اللى طالعه تحرر الشارع
القلب مرمر والبدن فارع
والوش نقشة إيد جدع بارع
والضحكة فرحة بنت...
بتصارع كلاب الشيش
مصر الديوان والحضره والدراويش
والتريقه وزحمة طابور العيش
مصر البطاطا ولجنة التفتيش
وكوزين عسل على دكة الكورنيش
ويمام معبّى فوارغ الخراطيش
مصر الغوريه ولمّة الحرافيش
ومواكب الرؤية وتمام الجيش
وسلام سلاح لمصانع الطرابيش
مصر اللى طالعه تواجه الخفافيش
طلعت تطبطب...
ع الولاد بشويش وتدعيهم
طلعت وراهم لاجل تحميهم
طلعت تسميهم ولاد النور
الأرض فارت فورة التنور
طرحت غلابه وطيبين وطيور
طرحت عشش وقصور
طرحت بيوت...
من غير فطار وسحور
طرحت كافور وبخور فى ليلة القدر
طرحت عيال طالعين يوفّوا الندر
طرحت بنات تشبه بنات البدر
ضربت عيار الغدر نص الليل
طرح العيار فى الصدر ميت قنديل
جاب الحمام البشرى من سجيل
رقصت عروسة النيل وقالت مصر
الدمعه فرّت من عيون القصر
دقّت رايات النصر فى الميادين
الدين لمين والصولجان من مين؟
واليوم دا يومك واللا يوم حطين؟
النور بيحدف فى الميدان بالطوب
والطوب بيحدف فى الميدان بالطين
الأرض بتنبت تقاوى قلوب
والنيل بيبدر ع المفارق تين
الكل ساكت ع المدى المعطوب
وأنتِ اللى طالعه تحركى الساكتين
وبتلعنى وبتسبى فى الخاينين
ملعون أبو التنين وأتباعه
ملعون أبو اللى واخدها بدراعه
ملعون أبو الراضيين بأوضاعه
ملعون أبو الساكتين على جياعه
ملعون صباعه اللى اتفرد بالموت
الأرض فارت فورة المكبوت
طرحت خيم ومعسكرات وبيوت
طرحت عرايا وتوت
طرحت طاغوت فاجر
طرحت خناجر من إيدين تاجر
طرحت جدع براوى ومهاجر
طرحت حناجر هزت الحراس
طرحت محاجر فوق عضام الراس
طرحت عزيمه وبندقيه وفاس
طرحت بشر لولى وبشر أنجاس
طرحت قلوب فضه وخلايا نحاس
طرحت وطن فرحان على الكراس
طرحت رصاص على دكة النخاس
طرحت كلام وسواس مالوش لازمه
الأرض فارت والسما ف أزمه
وابن الحرام ما سرقش قوت الناس
ابن الحرام رسم الوطن جزمه
الأرض فارت...
فورة الحزمه ف شواشى النار
ملت الشوارع والسكك ثوار
رقص الوطن على جتة الكفار
طلع النهار ناير
طرح الجريد على نخل فبراير
ضحكوا العماير والبيوت البوص
شرب الميدان فنجان وطن مخصوص
رقصت فصوص الحكمه فى ضلوعى
ربّت عيالى وشبّعت جوعى
رفضت دموعى تئن
مصر اللى ثارت واللا أنا اتجنّيت
الثوره قامت واللى قلبى اتجن
الشعر سيّال والدماغ بيفن
دبور وطن بيزنّ فى ودانى
واقف فى خيمة شعر ربانى
راكب خيول الأرض باتعاجب
وبابوس إيديا
وباجرى بحصانى
الأرض أرضى وكنت مش عاجب
والناس دى ناسى وكنت وحدانى
يا ام الخدود والشامه والحاجب
أنا فى البلد واللا ف بلد تانى
هاج الطوفان والشعب عدّانى
وأخدنى والدى ف إيده ودّانى
وزرعنى ورده ونور وبستانى
أنا شفت ناس واخدانى يم هناك
مصر البهيه بطرحه فى الشباك
ألفين ملاك واقفين بيدعولى
هز الهلال واضحك يا مدبولى
الحور هناك فى مقاسى وف طولى
وقصادى واد منغولى بيقول مصر
نسر العلم بيثبت الرايه
قلبى اتخلع وبيجرى ويايه
أنا شفت روحى بتحفظ القرآن
ولمحت قلبى بيقرا كام آيه
هِز الهلال وادعيلى بهدايه
واهتف ورايه وخدنى ضلايه
نهتف:
ولاد الكلب سلايه ف زوايا الروح
اطلع معانا وغنى يا أبوح
مصر الليلادى من الميدان بتبوح
مصر الليلادى بتفضح المفضوح
وبتكتب الممسوح على المدنه
مصر الليلادى...
ما عندهاش هدنه لمظالم حد
مصر الليلادى بتفرز العشاق
والضد ياخد عبرته من الضد
البحر هايج والبوغاز انسد
قلب الميدان أصبح مدينه ورِدّ
وش الميدان محتد
بدن الميدان بيسد ع الطواغيت
صوت الميدان هايج على الكتاكيت
آخر بيان من ساعه كان بيقول
الثوره قامت.....
حضّروا التوابيت.