رضا عبد العال : الزمالك محتاج 10 صفقات بالصيف..وبيكهام قد بدر بانون 100 مرة

يرى رضا عبد العال نجم الاهلى والزمالك الأسبق أن الفريق الأبيض يحتاج للتعاقد مع عشرة صفقات فى الميركاتو الصيفى المقبل ، وقال رضا عبد العال فى مداخلة هاتفية لبرنامج اللعبة الحلوة مع خالد الغندور عبر إذاعة أون سبورت إف إم:" لولا وجود الونش فى دفاع الزمالك كان الفريق يشيل 4 أهداف فى كل مباراة لانه أحسن لاعب فى مصر ، والزمالك محتاج 10 صفقات فى الصيف محتاج 2 ديفندر و 2 مساك وباك رايت ولازم يقول للفراودة بتوعه مع السلامة ".
وأكمل رضا عبد العال:"لازم الزمالك يرجع رزاق سيسيه وكمان مصطفى فتحى لانه بديل شيكابالا وميرجعش اوناجم تانى خالص ، ولازم يستمر أشرف بن شرقى وفرجانى ساسى".
وعن المنتخب الاوليمبى قال رضا عبد العال :"أرفض ضم محمد الشناوى فى اوليمبياد طوكيو ، بعد كورونا مبقاش الشناوى وكده كده هنخسر البطولة وهنخرج يبقى محمد صبحى يلعب وأتوقع شوقى غريب يضم أحمد حجازى مع ان الونش أفضل".
وعن الاهلى قال رضا عبد العال :" بدر بانون لاعب عادى وفى لاعيبة أحسن منه كتير مثلا أحمد بيكهام قده 100 مرة وحسين الشحات ضايع بس الاهلى مش هيمشيه عشان الفلوس اللى دفعها فيه، والاهلى اخطأ بإعارة أحمد ياسر ريان كان يشكل ثنائى رهيب مع محمد شريف".
وتابع رضا عبد العال:" الاهلى محتاج باك رايت ولازم يجيب بديل لأفشة ، لان ناصر ماهر بطىء ومينفعش بديل لأفشة،وأتوقع الاهلى هيقول لوليد سليمان شكراً فى نهاية الموسم رغم تمديد تعاقده ، وقولت لحسام عاشور متروحش حتة بعد الاهلى بس اصر واختفى فى الاتحاد السكندرى".