سامحينا يا مصر

سامحينا
العيب ما طلعش ف النظام لوحدة
العيب طلع فينا
يا مصر إحنا كمان برضه
لا بقينا عاجبين بعضينا
وبقى كل واحد عايز لوحدة
صوته اللى يتسمع فينا
ورأيه على غيره فارضه
زمان اتذلينا اتحبسنا
ف بلدنا وأرضنا
والنهارده أول ما شمينا نفسنا
شمناه على بعضنا
بقت العدوانية وسيلة
ف التعامل ما بينا
وقلّت الطيبة الأصيلة
اللى كانت جوا منا
فرشنا الشوارع لنصها
بضاعة وحاجات
وعملنا أكوام على جنبها
م الزبالة والمخلفات
ومشينا ف المعاكس
وكسرنا الإشارة
وما عدش حد حاسس
فينا بالتانى يا خسارة
كسّرنا الإستاد
وحدفّنا طوب
كتير بأعداد
علشان خاطر فريق مغلوب
بناخد حقنا بالدراع
وما بنلتمس لبعض الأعذار
وبقى كل بياع
بيغلى على كيفه الأسعار
وسواق الميكروباص
بيقف ف وسط الشارع
من غير ما يفكر ف الناس
اللى وراه وعامل إنه لكلاكستهم مش سامع
بناخد لسه رشوة
وبناكل حرام
يعنى مش كل العمايل الوحشة
بتيجى من النظام
سامحينا يا مصر سامحينا
إحنا فعلاً مشكلتك
سامحينا يامصردا العيب فينا
علشان للنهاردة لسة ما عرفناش قيمتك.