سبيل الصبر وألفين طريقة موت.. قصيدتان لمحمد حسن

سبيل الصبر
تمللى فى الطريق تايه ومِتْعَكِّز
بشوفه كتير أوى واقف قصاد الزير //
بتاع الصبر..ومْرّكِّز
بيشرب منه كوبايه ،،
وبيدندن له كام آيه
تعين قلبه على دَ القهر
سِمِعتهُ يقول على سِنُه ..شبابه عجوز
وإن الضحكة لو جاتله..ب تِلوى البوز
وبتفارق//
ومين للحلم كان سارق !! سوى خوفك
وليه بتخاف من المجهول !
وليه بتقول:
بإن الدنيا دى أقدار// ومن جواك بتنكرها
وتايه وسط أحزانك
وداير وسط كل الناس// بِتشكيلها // بصوت خافت
بصوت خافت مهوش مسموع
أهو تفضفض...وبالمرة
ما تلقاش حد بيواسي، ولا شمتان
ولا يقولوا : ياعينى عليه
مانا عارفك..
تموت أحسن مايتصَعَّب عليك الناس
ولو فاض بيك..
أشوفك ف الطريق تايه بتتعَكَّز
بتشرب من سبيل الصبر //--
وتدندن كذا آيه.. وتستغفر
وتتذكر.. سنين العمر
بالحلوة وبالمُرَّه
مهى الحلوة.. حلاوة روح
ووياها مرااار ياما
حقوق الطبع محفوظة..//ومتصانة لروحك بس
وحق البث ..!
من عمرك
بتدفع منه من غير حس
أيا غلبان هتعمل إيه؟!
ما ضاع حبك
وفات عمرك
وأهل وناس..
ومات قلبك معاه إحساس
يخليك حُر
يمر العام وراه العام
ونفس المُر هو المُر
هقولَّك إيه؟
تعالى نروح سبيل الصبر
ونتدارى..ونتخبى
أسى الأيام يغيب حبة
ونهجر دنيا غدَّارة
ولو هنعيشها ف مرارة.. بلاش اليوم
مهو خسارة..
يكون يوم الميلاد قاسي//
ونفس المُر هو المُر
ألفين طريقة موت
ممكن بِ سِم..
ممكن ب حتة موس..ويخلص كل دم
ممكن تِ شِم
تفضل ت شِم تْ شِم
تتحَوِّل عَدَم
ممكن تروح الغابة عند الزوحلفة
تلقى الأسد..واقف وفاكرك مِ الغنم
ممكن ب سلكين كهربا
واشبك صوابعك وسطهم..
وارقص ياعم
ممكن تموت م الضحك..من كُتر الألم
ممكن جوراحك كلها تفضل كئيبة
والنبضة فيك مستغربة...حاجه عجيبة
نايم وفجأة
جتتك...تغرق ف هم
ممكن ف مرة تكون بتلعن دنيتك
فَ تنُط من فوق الهرم
تنزل صنم
أو مرة تفرح فى الخيال..وتروح بعيد
تشطح أوي
ويقولوا : حسرة عليه...شباب
باراشوت أحلامه اتخرم
اهمَد بقى ..قلبك حِفي
نام وانكفي..بكفاية قسوة ومرمطة
وكفاية غم
ده العافية نعمة من النعم
ألفين طريقة موت ..ومليون اغتيال
هل ياترى..يبقى النصيب مش مِنُّهُم
هل ياترى..هتموت شهيد ؟
ربك كريم..
إدعيه و زَوِّد مِ العَشَمْ