يا صندوق

لأول مرة يا صندوق
طعم الحرية هندوق
دا ما بين حالى النهارده
وإمبارح كتير فروق
نويت مااكونش سلبى
ويكونلى دور ف بلدى
ويوم الانتخاب
هجيلك وأمد يدى
بورقة فيها اختيارى
خلاص بقى فارق قرارى
هجيلك أنا وأهلى
وهجيب معايا جارى
دا ياما منعتنى عنك الشرطه
وعملت عليّا مع البلطجيه أورطه
ووقفوا سوا ف طريق اللجان
يضربونى بالسنجه والمطواه
هجيلك يا صندوق دا من زمان
مجتلكش ويمكن دى أول مره أجى كمان
خلاص هجيلك يا صندوق دا إللى منعنى عنك
مشرف دلوقتى ف اللومان