أخويا شقيقى

لازم تعرف إن ولائى لوطنى حقيقى
ولازم تعرف إن طريق الحق طريقى
وأن طريقك هُوا طريقى
وأنت أخويا.. أخويا شقيقى
***
أمِّنا مصر وأبونا النيل
وتاريخنا فى وطنَّا طويل
وكفاحنا من أجله دليل
دينى أنا قبطى، وطبعاً مصرى
ومصرى وبس
ودينك مسلم... طبعاً مصرى
ومصرى وبس
لا بتحوير ولا بتزوير
ولا بالزق ولا بالعافية
بالجغرافية
عِلْم حقيقى
أنا أفريقى وأنت أفريقى
وأنت أخويا.. أخويا شقيقى
***
راح أحكيلك مَثَل إنسانى
فريق بريطانى وفريق أسبانى
هجروا بلادهم
عبروا البحر اكتشفوا أمريكا
استوطنوا فيها وعَمَّروا فيها
وزَرَعُوا وبَدَعُوا
ورسموا وصنعوا
ملايين مصنع... أو فابريكا
بغَضِّ الطَرْف عن البوليتيكا
هل أولادهم بقوا بريطان؟
وهل أحفادهم بقوا أسبان؟؟
طبعاً لأ
***
فيها المَجَرى وفيها الصينى
وفيها مكسيكى وفيها فيليبينى
وفيها روس ويابان وهنود
ومسيحيين وعرب ويهود
كل مواطن.. كل مواطن
كل مواطن صار أمريكى
وبس أمريكى
***
هل علشان.. دينك إسلام، بقيت عربى؟
طب لو صينى اتحَول مسلم، يبقى عربى؟
ولو صهيونى اتحَول مسلم، يبقى عربى؟
قول الحق!
طبعاً لأ
والا عشان.. بتحكى عربى، بقيت عربى؟
طَب لو صينى اتعَلِّم عربى، يبقى عربى؟
ولو صهيونى اتكلَّم عربى، يبقى عربى؟
قول الحق!
طبعاً لأ
والا عشان غَزُِونا العَرَب، بقيت عربى؟
طَب ما احتلُّونا يونان ورومان وبريطان
هل نقدر
نقول احنا جريك أو طليان أو بريطان؟
قول الحق!
طبعاً لأ
***
أمّا الأديان!!
بركة ونعمة وخير وإيمان
للإنسان
الأديان.. نور لمواطن... وللأوطان
ليه نعملها سبب للفُرقة وباب للنحس
أنت مصرى ومصرى وبَس
وأنا مصرى ومصرى وبَس
وكفاية المُغرض فتنة ودَس
***
قول كام دولة فى دُوَل العالَم
ناسهم تحكى بلسان واحد
ومعظمهم على دين واحد
بس وفاء الفرد لوَطَنُه
يفخَر بيه ويرفع شَأنُه
***
إحنا إزاى بالمستعمِر نقدر نفخَر
دا إحنا نبقى بمصر بنكفَر
نبقى بنشْرِك نبقى بنغْدُر
عصر الجهل عَدى وفات
وأنا وأنت عمرنا إخوات
تتبع شيخ.. واتبع قسيس
من غير فلسفة أو تدليس
إحنا أولاد مينا ورمسيس
إن كان على دينك، ما تسيبهوش
وإن كان ع الرب، ما تهملهوش
لكن وطنك افخَر بيه
وطنك اللى بتاكل منه وعايش فيه
وطنك بيتك تخلص ليه
ولا تشرك فيه
***
خلّى ولاءنا لمصر، وبس
فلا رومان ولا هكسوس
ولا بلاد أكلها السوس
لا غربية.. ولا عربية
لا من آسيا ولا بلاد تانية
هِى دى... روح الوطنية
مصر أعظم من أعظمهم
مش تزوير.. بل بجدارة
ليها تاريخ رائع وحضارة
مصر منارة
دايماً شعلة للحرية
مصر قلعة أفريقية
لقبطى ومسلم ومِلَل تانية
***
منذ البدء لو تتصَوَّر
لو حتدَوَّر
مصر مكانها ما عُمره اتغيَّر
فى الجغرافيا
تاج أفريقيا
***
من أعماق روحى ومن قلبى
وحياة مصر
وحياة ربِّى
أنا باحاول ألمس عقلك
أنا باحاول أكسب قلبك
أنا أفريقى وأنت أفريقى
وأنت أخويا.. أخويا شقيقى
ونفس طريقك هُوّ طريقى