ترانيم فرعونية

سلامة عيونك وربى يصونك = يا قارف حياتنا وقلبك كبير
سلامة جيوبك يا خالى عيوبك = قانونك يخلى الحرامى وزير
سلامة ولادك يا ناهب بلادك = بعنا عشانك حتى الحصير
سلامة قصورك وأزهى عصورك = ياهادم وبانى ومجدك خطير
سلامة مداسك وشعرك وراسك = ياقاسم علينا المَيه فى زير
سلامة شبابك ودرسك ونابك = جنابك تشاور وأمرك يصير
سلامة عظامك وشلة نظامك = يابايع هدومنا ولابس حرير
سلامة دراعك وطولك وباعك = يا كاسر خاطرنا وقلب الفقير
سلامة لسانك وضحكة سنانك = ديابه ف غابه ماليها مدير
سلامتك وعصبك خضارك وقصبك = شربنا المجارى ف عهدك عصيرسلامة الأيادى يا كايد الأعادى = قايدنا بغبائك لأسوأ مصير
سلامتك يا كلك يا وردك يا فلك = بتنهش رغيفى وتاكل فطير
سلامة الصوابع يا باصم وطابع = وبايع بيوتنا وترب الغفير
سلامة قروشك ونفخة كروشك = شبعنا فى عهدك لحوم الحمير
سلامة شفايفك يموت إللى عايفك = ويصبح يا سيدى عمره قصير
سلامة الكتاف ويحيا الهتاف = وصوتنا اللى خاف ينادى ف مسير
سلامة ديوكك رصيدك بنوكك = ودخلك ونخلك وسرك فى بير
سلامتك وضغطك زعيقك وشخطك = خطابك تاريخى وجوك عطير
سلامتك وكعبك مجوع فى شعبك = عبيدك بعيدك ما تقدر تطير
سلامتك وجسمك ورسمك واسمك = يا ظالم وباطش دا ربك بصير
سلامتك وقلبك ونشرب مقالبك = مخالبك تشيب رضيعى الصغير
سلامة الحناجر وغدر الخناجر = شفنا فى عهدك إهانة كتير
سلامتك وضهرك وبحرك ونهرك = دا قهرك حقيقى مالهش نظير
سلامة قرايبك رسومك ضرايبك = بنبكى ونشكى وربك مجير
سلامة الكلاوى وكتر البلاوى = سلامتك ورئتك شهيقك زفير
سلامتك وبطنك وصمتك ورطنك = وقطنك وكوستك وقمحك شعير
سلامتك وقدمك وجودك وعدمك = ويسلم طابورك لعيش البعير
سلامة وريدك وطمعك مزيدك = ميلادك وعيدك منحه لأجير
سلامتك ورجلك وريثك ونجلك = لأجلك قانون الوراثه شهير
سلامتك وكوعك وسجنك وجوعك = نجوعك وعششك وسكنك وفير
نهايتك جروح وترحل تروح = نهايتك دراما ف مشهد أخير