سلامتك يا وطن

يا أغلى الحبايب = سلامتك حبيبى من دمع الأنين
يا قلب المحبه يا كل السلام = يا رمزالطهاره يا نبع الحنين
جامع بيدعى المولى يصونك = كنيسه بتهتف جنبه أمين
بنغزل نسيج المحبه بإيدنا = قلوبنا بتعزف بحبك رنين
لو جات غيمه مسَّت طيفك = يصبح كل الشعب حزين
لو جات شوكه لواحد فينا = تصبح آه صوت الملايين
تنده تلقى ولادك جنبك = صاينه العهد بألف يمين
لو شعب اتفرق رايح يضيع = شعب موحد نصره مبين
كل ولادك رهن إشارتك = نفس الحلم معاك راسمين
مركب ماشيه لبر أمان = مهما الموج أوريح ماتلين
مهما غادر حاول يفتن = يلقى حبل الحب متين
يعرف إنى الحب شعارنا = ورمز الوحده أسد فى عرين
وطن يرفرف ليه جناحين = حسن ومرقص غيرهم مين؟
جرح وفرح وحتى اللقمه = عمره ما فرَّق بينا لعين
نفس ملامح الوش بتحكى = قصة شعب تاريخه يقين
حتى فصيلة الدم باسمك = والنبض بيعزف مصريين
سلامتك يا وطن يا أغلى الحبايب = يا فخر المحبة وتاج الجبين