بأيدينا قرى من ذهب .. فى قرية "غرب سهيل بأسوان ".. احنا والتماسيح في بيت واحد .. سعر التمساح الصغير 200 جنيه والكبير 3000.. ومربية: بتكلم معاهم وبخاف عليهم زى عيالي بالضبط

لا تتعجب إذا رأيت فتاة تمسك بتمساح صغير في يدها كأنه قطة أو جرو صغير، فإنها عادة في البيوت الأسوانية أن نجد تربية التماسيح لدى أهلها، فهم يعشقون تربيتها وهى مصدر سعادة ورزق في آن واحد، حيث يأتي السياح من كل مكان حول العالم ليروا تلك التماسيح ويلتقطون الصور التذكارية معها.
كيفية اصطياد التماسيح
من داخل إحدى قرى محافظة أسوان وبالتحديد قرية غرب سهيل كان لعدسة اليوم السابع جولة ممتعة ومثيرة مع الأهالي لمعرفة كل شىء عن تربية التماسيح؛ فكان اللقاء مع سناء النجار مربية تماسيح بالقرية، والتى قالت:"احنا بنربي التماسيح من زمان انا طلعت لقيت في بيتنا التمساح، وكل واحد من اخواتي عنده التمساح بتاعه، التماسيح بتتولد في شهر 5 بيصطادها الصياد من بحيرة ناصر بالسنارة والجراكن لو كانت كبيرة، أما لو صغيرة فبيصطادها بالشبكة مع السمك، وفي اللى بيكونوا غاويين الصيد كهواية بيصطادوها بالبنادق وفي الغالب التمساح بيموت وبيخدوه يحنطوه".

السمك الأكل المفضل للتماسيح
وتابعت "مربية التماسيح":" تربية التماسيح مش صعبة بالعكس سهلة جدا لأن التمساح حيوان هادئ، على الرغم ان تصنيفه من الحيوانات المفترسة، لكن عشان احنا بنجيبه صغير وبنربيه فبيتعود علينا وبيعرفنا ومش ممكن يأذينا، كل البيوت في قريتنا بتربي التماسيح والاكل المفضل للتمساح هو السمك بنجيبه وبنقطعة جزل ونرميه له في البيت بتاعه بياكله.. في الشتا التمساح مابياكلش كتير يعنى ممكن يوم ويوم لأنه بيعمل بيات شتوى وبيخزن الأكل في جسمه، لكن بيحب الأكل في الصيف وبياكل كتير جدا مرات سمك ومرات تانية لحمة لكن السمك أكثر".
التقاط الصور ملاذ السائحين مع التماسيح
وتابعت "سناء":" بيت التمساح بيكون من السيراميك بنبنيه في وسط البيت ولازم نحط عليه شبكة حديد عشان ما يخرجش، وفي الصيف بحطله ميه كتير وبنغيرها كل يوم او يومين لكن في الشتا بندفيه وبنفرد عليه اى حاجة صوف، لازم نهتم بالتمساح عشان هو مصدر رزق لينا، وهو حى بييجى السياح يتفرجوا عليه ويتصوروا معاه وبناحذ فلوس علي كده ولو مات بنفتح بطنه ونحنطه وبعدين نحشيها قش وبقفلها ونبيعوا كزينة في البيوت، في كل الاحوال التمساح مصدر رزقنا".
أسعار التماسيح
واستطردت "السيدة النوبية" حديثها عن أسعار التماسيح قائلة: ان سعر التمساح الصغير 200جنيه والمتوسط 500جنيه والكبير 700جنيه أما أكبر حجم فسعره 3000جنيه.
من نظرة العين تبدأ العلاقة بين التمساح والمربي
هناك علاقات بين البشر تخضع لها القلوب والعقول، ولكن مابالنا بعلاقة المربي وحيوانه، تقول "سيدة التماسيح" :" علاقتي بالتمساح قوية جدا لأنه يفهمني من نظرة عيني، تمسحتي اسمها نانسي من صغرها معايا انا اللي مربياها بحكى لها كل حاجة ولما بكون مضايقه مع جوزى شويه بقولها بحس انها بتفهمنى، حتي بناتي كل واحدة فيهم لها تمساح مربياه، أنا بخاف علي تماسيحى زى عيالي بالضبط ".




تربية التماسيح
نيل اسوان
غرب سهيل
نهر النيل
بحيرة ناصر
الموضوعات المتعلقة
بأيدينا قرى من ذهب.. "غرب سهيل" تتزين بالمشغولات اليدوية فى أسوان.. الأهالى: جمال الطبيعة ودقة الحرف اليدوية تجذب السائحين.. والشباب: لا مكان للوظيفة الحكومية فى قريتنا.. فيديو وصور
الثلاثاء، 28 يناير 2020 04:43 م
بأيدينا قرى من ذهب.. فى المنصورية "اتمخطرى واتمايلى يا خيل".. ترويض الخيول فى رحاب صحراء الأهرامات.. حكايات عن الخيل العربى يرويها المدرب عماد صلاح.. ويؤكد: ينافس فى أكبر المحافل الدولية
الخميس، 23 يناير 2020 06:12 م
فيديو.. قرى من ذهب.."القرنة"في بر الأقصر الغربي.. احتفظوا بأسرار الفراعنة ليثبتوا للعالم أنهم ملوك صناعة الألباستر والنحت على الأحجار في العالم.. أهالي القرية خير سفراء لأجدادهم وكل فرد بها يتحدث سبع لغات
السبت، 18 يناير 2020 05:31 م
بأيدينا قرى من ذهب.. فخار دسوق بصمة فى عالم الخزف.. محروس: كل صنايعى له بصمة تميز شغله.. ونصنع كل شىء من الفخار من الأواني إلى منتجات الخزف.. وهذه خطوات الصنعة.. فيديو وصور
الأربعاء، 15 يناير 2020 03:46 م