ننشر نص تحقيقات "فتنة إمبابة".. غياب أقوال "أبو يحيى" من ملف القضية أبرز المفاجآت.. وعبير: تزوجت عرفياً من "ياسين" للسكن وتركت زوجى لعدم قدرته المالية.. ولم أتسبب فى أحداث الفتنة

حصل "اليوم السابع" على نص تحقيقات النيابة العسكرية ونيابة أمن الدولة العليا فى القضية رقم 227 لسنة 2011 أمن دولة عليا، والمعروفة إعلامياً ب"فتنة إمبابة"، والمتهمة فيها عبير طلعت فخرى و48 شخصاً آخرين.
فيما غابت أقوال محمد مفتاح فاضل الشهير بأبو يحيى، المتهم الثانى فى القضية، حيث لم تجر نيابة أمن الدولة العليا معه أى تحقيق على خلفية تلك الأحداث، لافتا فى تصريحات خاصة ل"اليوم السابع" إلى أنه تم إحالته للمحاكمة الجنائية دون سماع أقواله أو سؤاله عن الواقعة.
وإلى النص الكامل لأقوال عبير:
ما سبب حضورك لديوان المديرية؟
حضرت لأسلم نفسى بمحض إرادتى وأقول الحقيقة بسبب الأحداث التى جرت فى منطقة إمبابة، وأدت إلى إصابة وموت عدد كبير من المسلمين والمسيحيين.
ما علاقتك بياسين ثابت أنور جلال؟
ده راجل بلدياتى وكان يساعدنى فى حل مشاكلى وعلاجى وإشهار إسلامى.
قرر ياسين ثابت أنور بأنه متزوج منك عرفياً وقدم صورة ضوئية لعقد زواج عرفى بارتباطه بالزواج منك، ما قولك؟
هذه ورقة تم كتابتها للبحث عن سكن نقيم فيه، وأيضا فى حالة سؤال أحد من المسيحيين يعرف إننا اتجوزنا.
هل كنت مرتبطة بالزواج من قبل من شخص آخر؟
نعم أنا كنت متزوجة وأنا مسيحية من المدعو أيمن جمال فتحى، وأنجبت منه بنت صغيرة اسمها مريم وعمرها ثلاث سنوات ونصف.
ما تاريخ ارتباطك بالزواج من أيمن جمال فتحى؟
أنا متزوجة فى 23/11/2006
ما الذى حدث عقب ذلك؟
أنا تزوجته وعشت معه فى قرية ببويط – بمركز ساحل سليم محافظة أسيوط، وخلال فترة زواجى منه حتى تركى البلد فى 15/9/2010 حدثت مشاكل وخلافات زوجية كثيرة بيننا، وسبق قيامى بترك منزل الزوجية أكثر من مرة بسبب تلك الخلافات.
ما هى نوع تلك الخلافات والمشاكل الزوجية التى كانت بينكما؟
أمه كانت مسيطرة عليه ودائما تكون هى السبب فى المشاكل بيننا وهو مكنش بيشتغل.
ما الذى حدث بعد تلك الخلافات والمشاكل بينكما؟
خلال تلك الفترة كنت بركب مع سواق اسمه ياسين من بلدنا، وكنت بركب معاه على طول واعترفت عليه، وكمان كان بيحكيلى على مشاكله، واستمرت العلاقة به عدة شهور، وفى تلك الفترة اتفقنا على الفرار سويا، وركبنا ميكروباص من ساحل سليم، وقابلنا واحد اسمه جعفر، وكنت أول مرة أشوفه، وكان معاه مراته وعياله وركب عربية ميكروباص أمامنا، واتفقنا إننا نتقابل فى موقف عبود فى مصر، وبعدين خدنا عربية مخصوص أنا وياسين وجعفر ومراته وأولاده، وروحنا بيها بيت جعفر فى قرية وروارة بمحافظة القليوبية فى تلك الفترة، جعفر كان عارف إنى أخت ياسين، وأنا فى بيت جعفر ومراته شافت الصليب اللى فى ايدى، وعرفت إننى مسيحية، فقال ياسين لجعفر ايوه مش اختى دى واحدة مسيحية وعايزة تسلم، وأنا قعدت فترة فى بيت جعفر ومراته، وجعفر وياسين قابلوا الشيخ جمال، وحكوا له الحكاية اننى عايزة أشهر إسلامى، فطلب منهم تجهيز سيارة والحضور له بمحل إقامته بمركز قويستا بمحافظة المنوفية، ويروح معانا لمشيحة الأزهر علشان يساعدنا فى إشهار إسلامى.
وبعدين ركبت معاهم العربية أنا وياسين وأيمن السواق والشيخ جعفر ورحنا للشيخ جمال رمضان فى بيته بقويسنا، وقعدنا معاه وكان فى واحد اسمه عصام ماسك مدارس مبارك كول، وتحدثنا فى الدين الإسلامى والمسيحى والفرق بينهما، وأنا أقنعتهم برغبتى فى إشهار إسلامى، اتفقنا إننا تانى يوم نروح للشيخ جمال، وفعلا كان معانا أيمن بعربية وجعفر معانا ورحنا قويستا وركب معانا الشيخ جمال وعصام ورحنا الأزهر، بعدما جهزت صورا بحجاب وكتبت الاستمارات، ودخلت لشيخ وأبديت رغبتى فى إشهار إسلامى، ورغبتى وقناعتى بذلك وأخذ بطاقتى، وفعلا انتهيت من إجراءات إشهار إسلامى، وغيرت اسمى إلى أسماء محمد أحمد إبراهيم، ورحت بعد كده وزارة العدل فى نفس اليوم ووثقت إشهار إسلامى.
وإحنا راجعين فى العربية اتصلت زوجة جعفر، وقات لى إن فى ناس بيسألوا عليا، فجعفر قالى انه مينفعش أرجع البيت، فالشيخ جمال قاله إحنا نروح عندى البيت ونزلت أنا وياسين وأحدنا حاجتنا كلها والشيخ جمال كان راح بيته وخدنا العربية بأيمن السواق ورحنا الخصوص عند قريبة ياسين، وقبل كده كنا كتبنا ورقة زواج عرفى بمكتب عصام، وقعدنا حوالى أربعة أيام، وبعد كده روحنا أقمنا فى البراجيل فى شقة ورحنا قعدنا فى شقة ثانية جانب البراجيل، وأنا كنت مريضة فى تلك الفترة، وبروح لدكاترة بعد كده أيمن حجه أخدنا ورحنا قعدنا فى شقة، وبعد كده فوجئت بأهى فى الشقة الكلام ده كان فى 1/3/2011، وأخدونى وهو كان أخويا إيهاب وابن خالى جمال وابن خالى لطيف وعماد ابن خالتى ورحت معاهم على البلد على دير العذراء مباشرة، وأعدت حوالى أسبوع وقعدت أتنقل فى منازل وبيوت تبع الكنيسة، فى الفترة دى أنا كلمت ياسين وقولتله على اللى حصل، وهو عملى شوشرة بورقة إشهار إسلامى وورقة الزواج، والناس كلها فى البلد عرفت أننى أسلمت والكهنة فى الكنيسة شافوا ورقة إشهار اسلامى والزواج، وقالولى ممكن نعملك ورق عودة إلى الكنيسة تأنى، وحددوا الورق منى فى 1/5/2011 وجينا مصر مع كاهن الكنيسة باخوم، ورحنا الكتارائية بالعباسية، علشان يخلصوا ورق العودة، وطلبوا منى ورق الزواج العرفى، وأنا رفضت علشان قولتاهم إنى اتخلصت من الورقة، فطلبوا منى عمل محضر بالقسم بأن ياسين متزوجنى عرفى، وفى الحالة دى لو ياسين رد على المحضر هما فهمونى أنه هيتحبس سبع سنوات علشان اتجوزنى، وأنا أصلا متزوجة من أيمن، فطلع فى غلطة فى قسيمة الزواج، فخدنى الكاهن باخوم لكنيسة مارمينا بإمبابة، وقعدت مع أبونا أبانوب فى بيت تابع لكنيسة جنبها، والبيت ده سبع ادوار ممكن أطلع وأنزل داخل البيت، لكن مقدرش أخرج بره البيت، علشان هو مقفول بباب حديد، وكان فى رهبته ملازمنا على طول والغرفة اللى كنت قاعدة فيها مفيهاش شباك علشان كانت الرهبة قفلاه، وأنا كان معايا تليفون محمول واتصلت على ياسين وكلمته علشان أقوله إن لو حد عمل فيك محضر إننا متجاوزين عرفى انكر الكلام ده، علشان متتحبس، وقولتله أنا فى بيت تبع الكنيسة مارمينا فى إمبابة، واسم البيت يوحنا القصير، وسألنى فين بالضبط قولتلع فى شارع المشروع الكنيسة على اليمين والبيت على الشمال، فى الفترة دى قالى أنا موجود فى إمبابة، وطلب منى أخرج من البيت علشان نمشى سوا، فأنا قولتله أنا رابحة السجل المدنى علشان أصلح البطاقة ههرب وأجيلك علشان نمشى، وقولتله لو معرفتش أتقابل معا تروح للشيخ جمال واتصل عليك بعد كده علشان تجيلى عند الشيخ جمال، وبعد كده سمعت بعد يومين خناقة فى الشارع وصوت عالى فنزلت للراهبة، وسألتها هو فى أية وكانت بتكلم فى التليفون المحمول مع أبقيس أبانوب، وقلها افتحى الباب وخرجى البنت اللى عندك ومشيها فى الشارع، وأنا سمعت الكلام لأنها كانت فاتحة الميكروفون بتاع التليفون، وقالتلى بسرعة خدى حاجتك وامشى.
ما الذى حدث عقب ذلك؟
نزلت لقيت فى خناقة فى الشارع، وانا ماشية فى الشارع أنا وبنتى لقيت الناس بتقول البنت بتاعت أسيوط لازم تطلع وركبت توك توك مع واحد شيخ معوق وحكيتله حكايتى، وإن الخناقة اللى فى الشارع دى بسببى، فعرض عليا أنى أروح معاه البيت ورحت هناك، وأقعدت حوالى نصف ساعة فى الفترة دى كان تليفونى بيرن كتير فرديت لقيت واحد بيقولى انتى فين، روحت قافلة التليفون على طول، وأنا قاعدة مع مرات الشيخ كان هو نزل علشان يشوف إيه اللى يحصل فى الشارع، ورجع قالى إن فيه كنيسة اتحرقت وناس ماتت، وخدنى وركبنى تاكسى علشان أروح للشيخ جمال بتاع قويستا، ولما وصلت فضلت أسأل على بيت الشيخ جمال لحد ما وصلته، وصلت الساعة الثالثة صباحا، وبيت عنده لحد الصبح أنا وبنتى والشيخ جمال شاف لى شقة علشان أروح فيها بالقرب من قويسنا حوالى ثلث ساعة، والشقة كانت فى الدور الرابع وروحتها مع الشيخ جمال وصاحب الشقة، وقعدت فى الشقة دى يومين فى أول يوم جالى الشيخ جمال ومع الشيخ إيهاب والشيخ إبراهيم وكلهم ملتحيين وإيهاب عمل معايا لقاء على كاميرا صغيرة، وحكيت فيها عن أحداث إمبابة وقولتله إنى كنت مسيحية وأسلمت، ووجهت كلمة لبابا شنودة وأبونا أبانوب إننى مسلمة وسيبنى أعيش حياتى، وأنا اخترت طريقى وهو فهمنى إنه هيطلع اللقاء ده على النت علشان الناس تشوفه، ومشى وتأنى يوم جالى الشيخ إيهاب، وقالى إن الشيخ جمال وإبراهيم اتمسكوا وإنى لازم أمشى من الشقة، وخدنى ودانى لشقة واحد تأنى شيخ معرف اسمه فى بلد أرياف على بعد حوالى ثلث ساعة من الشقة اللى كنت قاعدة فيها، وقعدت مع مراته وهو عنده ولدين وبنت اسمها أسماء وبيت عند الشيخ يومين، والصبح الشيخ قالى نروح النيابة النهارده علشان تقولى أقوالك، وجه الشيخ إيهاب ومع عربية ملاكى وكان بيسوقها شيخ أنا معرف اسمه، ومشينا بالعربية لحد موصلنا لعربية ثانية راكب فيها اتنين معرف اسمهم لحد ما وصلت النيابة.
منذ متى تم إشهار إسلامك؟
أنا أسلمت بإشهار إسلامى فى 23/9/2010 بمشيحة الأزهر الشريف
هل أجبرك أحد على إشهار إسلامك؟
لا أنا أشهرت بكامل إرادتى واقتناعى بالدين الإسلامى.
هل معك ما يفيد ذلك؟
أيوه أنا على ديانتى المسلمة حتى الآن.
ملحوظة: قدمت لنا صورة ضوئية من إشهار إسلامها صادرة من مجمع البحوث الإسلامية لجنة الفتوى بالأزهر الشريف، مفادها إشهار إسلامها واعتناقها الدين الإسلامى، وتغيير اسمها من عبير طلعت فخرى غالى إلى أسماء محمد أحمد إبراهيم وموثق من وزارة العدل.
هل حرضك المدعو ياسين ثابت أنور على ترك منزل الزوجية وبلدك؟
لا أنا روحت معاه بإرادتى
وما الذى حدث بعد ذلك؟
أنا أشهرت إسلامى واتجوزنا عرفى فى 23/9/2010 بذات يوم إشهار إسلامى
وهل معك مايفيد ذلك؟
أيوه.
ملحوظة: قدمت صورة ضوئية من عقد زواج عرفى متضمن طرف أول ياسين ثابت أنور جلال وطرف تانى أسماء محمد أحمد إبراهيم بارتباطهما بالزواج ارتباطا شرعى بشهادة كل من جمال رمضان عبد اللطيف محمد وأيمن وجية عبد الجليل يوسف.
أين بطاقتك الشخصية؟
بطاقة الرقم القومى بتاعتى واحد أخدها منى فى كنيسة مارمينا دائرة قسم إمبابة ومعايا صورة منها.
ملحوظة: تم إرفاق صورة ضوئية من بطاقة الرقم القومى باسم عبير طلعت فخرى غالى.
هل قمت باستخراج بطاقة رقم قومى عقب إشهار إسلامك؟
أنا فعلا مليت استمارة عمل بطاقة رقم قومى باسم أسماء محمد أحمد إبراهيم.
ملحوظة: قدمت إلينا المذكورة أصل استمارة رقم قومى باسم أسماء محمد أحمد إبراهيم
ما هى آخر مرة اتصل بك المدعو ياسين ثابت أنور؟
هو اتصل بيا قبل الأحداث بيومين من تليفونه المحمول.
وما هو الحوار الذى دار بينك وبينه؟
أنا اتصلت بيه وحكيت له اللى حصل، ووصفت له المكان الموجودة فيه بالتحديد والشارع، وتواجدى ببيت بجانب الكنيسة مارمينا بشارع المشروع بمنطقة إمبابة، ووصفت له البيت بالتحديد، وهو قالى انا جنبك فى إمبابة، وأنا قولتله إنى هحاول الخروج بحجة استخراج البطاقة واتصل بيك علشان تيجى ونهرب سوا أو هروح للشيخ جمال وأتصل بيك.
هل اتخذت إجراءات عودتك لكنيسة مرة أخرى والدين المسيحى عقب إشهار إسلامك؟
أنا روحت الكنيسة هما قالوا لى علشان ترجعى هتغيرى البطاقة من أنسة إلى متزوجة وهيدونى اسم زوجى على البطاقة، لكن الكلام ده مايمشى، وأنا كنت رافعة قضية طلاق على جوزى أيمن، علشان أنا اعتنقت الدين الإسلامى، وهو لا يجوز لى علشان هو مسيحى الديانة وأنا بقيت مسلمة.
وما هى بيانات تلك الدعوة المرفوعة ضد زوجك أيمن جمال فتحى؟
أنا مش عارفة رقم القضية وأنا رفعتها فى محكمة الأسرة بتاعة قويسنا بتاريخ 5/1/2011، وتحدد لها جلسة بتاريخ 29/5/2011، وأنا موكلة محامى بتلك القضية.
وهل احتجزك أحد عقب علم أهلك بإشهار إسلامك؟
أنا بعد ما أهلى عرفوا إنى أشهرت إسلامى أخذونى من وروارة، وأودعونى فى دير العزراء بأسيوط، وبعد كده أودعونى فى بيوت تابعة لكنيسة حتى آخر مرة أودعونى فى بيت يوحنا القصير تابع لكنيسة مارمينا، وأنا كنت محتجزة فى البيت، ده علشان أنا مكنتش أقدر أخرج من البيت علشان هو مغلق باستمرار ببوابة حديدية، والغرفة اللى كنت قاعدة فيها يوجد بها شباك يطل على المنور بالدور الخامس، وكان معايا راهبة طوال فترة تواجدى داخل البيت.
هل يمكنك الخروج من المنزل المسمى يوحنا القصير؟
لا علشان البيت مغلق على طول بباب حديد، والشباك على المنور معرفش أخرج منه أبدا.ً
وكيف تمكنتى من الخروج حالة اندلاع الأحداث؟
الراهبة خرجتنى من البيت وقالتلى خدى حاجتك وبنتك والكنيسة بريئة من دمك.
أنت متهمة بالادعاء كذباً أمام المسئولين بمشيخة الأزهر بأنك آنسة، مما أدى إلى صدور شهادة إشهار إسلامك بأنك أنثى؟
الموظف الموجود بمشيخة الأزهر دون بياناتى من واقع بطاقتى الشخصية.
أنت متهمة بالتسبب فى إحداث فتنة طائفية بين المسلمين والمسيحيين بدائرة قسم إمبابة، نتج عنها مقتل وإصابة العديد من المواطنين المسيحيين والمسلمين؟
أنا مليش دعوة بالأحداث دى خالص، والكنيسة هى اللى ودتنى البيت ده اللى فى إمبابة، وحطونى فيه، ومليش دعوة باللى حصل.