فريد الديب ومبارك والثورة

أنا أحسد الأستاذ فريد الديب على جرأته غير المحدودة، فلا أحد غيره، وهو صاحب التاريخ المعروف فى مهنة المحاماة يستطيع أن يقول وبجدية شديدة وفى برنامج تليفزيونى يشاهده الملايين "مبارك كان أول من أيد الثورة"، يا مثبت العقل والدين يا رب، شوف المنطق، إزاى يا عم فريد؟ يقولك "لأنه قرر الرحيل استجابة لمطالبها".
من حق فريد الديب باعتباره محامياً، أن يدافع عن موكله فى المحكمة بمختلف الدفوع والتبريرات، لكن ليس من حقه أن يستخف بعقولنا أو أن يحاول خداعنا واستدرار التعاطف المجانى مع الطاغية المخلوع، كأن يقول إن "مبارك زعلان من الشعب بسبب الحملة الظالمة التى يتعرض لها، وهو ما أثر بشكل واضح على صحته"، فهذا المنهج من مزج المحاماة بحملات العلاقات العامة، والذى يبرع فيه فريد الديب، لا يمكن أن ينطلى على عموم المصريين الذين خلعوه وأنهوا عصره البائس.
يا سيادة المحامى اللوذعى، إذا كنت لا تدرى فتلك مصيبة، ولكنك تدرى فالمصيبة أعظم، تدرى أن جرائم مبارك وحاشيته وعناصر الفساد فى إدارته، أكبر من الاتهام بالاستيلاء على المال العام وتسهيل المهمة على غيره، وأكبر من سفك دماء مئات الشهداء وآلاف المصابين دفعوا أرواحهم ودماءهم وسلامتهم ضريبة واجبة من أجل تحرير هذا الوطن، فهذه الجرائم وأنت أول من يعرف بحكم خبرتك وعملك وانغماسك فى الدوائر القريبة من الطغمة الحاكمة، تبدأ بإرساء معايير النهب العام للثروة القومية وتدشين عصر البحث عن الطعام فى صناديق القمامة والحياة فى المقابر وتحت خط الفقر، تبدأ بإرساء الفوارق الاجتماعية الهائلة وتنتهى بالتكريس لليأس العام طريقاً وحيداً أمام عموم المصريين.
هل تعرف يا سيادة المحامى الهمام ماذا كان الناس يهتفون لمبارك أثناء الثورة التى تدعى زوراً وبهتاناً أنه كان أول مؤيديها؟ اسمع يا أستاذ فريد ماذا كنا نهتف حتى سقط الديكتاتور، وعليك بعدها أن تستحى:
- مش هنمشى هو يمشى
- يا مبارك يا خسيس دم المصرى مش رخيص
- يا مبارك قول الحق إنت حرامى ولا لأ؟
- ارحل يعنى امشى يمكن بميفهمشى
- ارحل يلا يا عم خلى عندك دم
- يا جمال قول لأبوك الشعب المصرى بيكرهوك
- يا للعار يا للعار حسنى بيضرب شعبه بنار
- يا حرية فينك فينك أمن الدولة بينى وبينك
- يا حرية فينك فينك الطوارئ بينى وبينك وأيضا حسنى مبارك بينى وبينك
- ثورة ثورة حتى النصر ثورة فى كل شوارع مصر
- ثورة مصر جاية جاية بالعدالة والحرية
- خالد سعيد مات مقتول ومبارك هو المسئول
- واحد.. اتنين.. الشعب راح فين
- ارفع صوتك زى الناس.. إحنا كرهنا الظلم خلاص
- صحى الخلق وهز الكون.. مصر بلدنا مش هتهون
- يا أهالينا يا أهالينا.. ضمو علينا ضمو علينا
- يا وزراء طفوا التكييف مش لاقيين حق الرغيف
- والإصلاح بقى شىء مطلوب قبل الشعب ما يأكل طوب
- بالطول بالعرض هنجيب النظام الحاكم الأرض
- اصحوا وفوقوا يا مصريين.. مش هنقول للظلم آمين
- ثورة ثورة يا مصريين على حزب المجرمين
- اصحى يا شعب وقوم من النوم وخد حقك من ده اليوم
- احلف بسماها وبترابها الحزب الوطنى الخربها
_ حكم الأب باطل.. حكم الأم باطل.. حكم الابن باطل
- حسنى بيه يا حسنى بيه كيلو اللحمة ب100 جنيه
- حط محمد جنب حنا ترجع مصر تانى جنة
- يا سوزان قولى للبيه ربع قرن كفاية عليه
- يا مبارك يا خسيس دم المصرى مش رخيص
- شيلو ميارك حطوا خروف يمكن يحكم بالمعروف
- مبيفهمش عربى.. كلموه بالعبرى
- آخر طلعة جوية لازم تكون ع السعودية
- ارفع صوتك زى الناس.. إحنا كرهنا الظلم خلاص
- عيش .. حرية .. كرامة إنسانية
- مش هنخاف مش هنطاطى.. إحنا كرهنا الصوت الواطى
- يا بن على قول لمبارك.. مين فى الشعب المصرى اختارك
- يا بن على قول لمبارك.. جدة جدة فى انتظارك
_ غلى السكر غلى الزيت بكره نبيع عفش البيت
- آه يا حكومة هز الوسط بكره العيش نجيبه بالقسط
- يا علاء قول لبابا أنت بتسرق ف الغلابة
- يا جمال يا أبو فريدة أبوك خلانا ع الحديدة
- يا مبارك قول لابنك لما تشوف حلمة ودنك
_ اللى بيضرب أهله وناسه يبقى عميل من ساسه لراسه
- حاصروا العدو متحصروناش يلى بعتوا بلدنا بلاش
- مبارك يا مبارك الطيارة فى انتظارك
- قوم يا مصرى امحى عارك.. يسقط يسقط حسنى مبارك