ولاد البطة السودة

من مفاهيم البورصة الأساسية الموجودة فى الدنيا كلها هى العدالة، كيف؟
أن الفرص متساوية أمام الجميع فى المكسب والخسارة وفى قواعد التداول، يعنى أى حد يشترى ويبيع بعد بكرة، بكرة، دلوقت حالا إنما كله زى بعضه). أما فى مصر المحروسة ماذا يحدث؟
الطبيعى أن الناس العادية (ولاد البطة السودة) تشترى السهم النهاردة وتبيعه بعد بكرة... ماشى عادى!!!
أما الناس السوبر فليهم نظام تانى إيه هو؟ أنه يشترى دلوقتى ويبيع بعد 5 دقائق (نظام الزيرو).......تقولشى ازاى هو كده!!!
ليه بقى؟ لأنه بيشترى فى شركات سوبر عن طريق شركات سمسرة سوبر برضه ما هو راجل سوبر من الأول!!!!
وفى حاجة كمان زيادة للناس السوبر أن المؤشر بتاعهم سوبر لأنه مش بيتحرك إلا لما الشركات السوبر تتحرك أما لو كل السوق طلع والكام شركة السوبر نزلوا أو وحدة منهم حتى نزلت يبقى لازم السوق يتطربق على اللى فيه.
ونرجع نقول ليه الناس ولاد البطة السودة (المستثمر الصغير) بتخسر!!!!. والحمد لله بعد الثورة اتجمد النظام السوبر وبقى كل الناس زى بعض (عدالة بقى) إنما ازاى !!الناس السوبر تزعل!!!!! وعشان ما نعوضهم هنرجع لهم النظام السوبر تانى ( الزيرو) ومش كده وبس وهنحطلهم كمان (الشورت سيلنج) عشان الراجل السوبر يعرف يشترى السهم بعشرة جنيه ويطلعه 10,5 فى خمس دقائق ويبيعه لابن البطة السودة ويرجع ينزله تانى .
الجديد بقى كمان أنه مش هيبيع الأسهم اللى لسه شاريها بس لأ ده كمان هيبيع اسهم مش بتاعته زيادة ولما تنزل يبقى يشتريها ؟؟ ما هو عارف انه هينزلها تانى (يعنى مش كفاية يكسب طالع لأ كمان يبقى يكسب طالع نازل) وماله ما هى الشركات السوبر بتاعتنا وشركات السمسرة بتاعتنا والمؤشر بتاعنا نطلعه ننزله ,نفرده , نكويه ولا عزاء لولاد البطة السودة اللى فلوسهم عمالة تتحرق قصادهم من غير ما يفتح بقه وابقى قابلنى بعد بكرة وسلملى على العدالة والشفافية.