: لا للعنوسة

يا ساكنة قلبى قمر منى ماتزعليش
انت حلم الليالى لقلبى غيرك مفيش
البصه فى عنيكى لعطشى تروينى
قولى لابوكى بلاها بعزقه والنيش

قلوبنا ستاير كناريا من غير ريش
وقلة حبنا مالهاش شبيه ولا فيش
شهد الرضاب منك عسل يداوينى
قلبى صالون حبك عنه ما تغيبيش

وجباتنا سوا شهد ينسينا الجريش
كفاية من الاوانى اتنين لا تحابيش
انت ياحبيبتى تاج راسى يهنينى
عايزك دلوقتى للعزوبيه تطفيش

البعزقه سكه ندامه اول التلطيش
والدين قلق والحيرة تبقى بقشيش
الاعتدال سلوك يسعدك ويحمينى
تروى السعادة حياتنا ولا تعطيش

قولى لست الحبايب انا وياه اعيش
ساكن قلبى يامه وغيره ليا مفيش
فى ليالى الزمهرير حبه يدفينى
حبه محرابى امل ماتعرفه خفافيش

كتبت اسمك فى قلبى بكل المناقيش
وعزفت حلمى بيكى زى الدراويش
عن الليالى وحلم الورد لا تسألينى
قلبى تايه فى حبك وكل يوم تفتيش