مصر النهاردة

يا أهل مصر المؤمنة، ياكل واحد مننا
يا كل شابة وكل شاب وكل فرد ف شعبنا
الثورة قامت م الميدان وبسرعة غطت مصرنا
وانزاح كابوس كان من زمان كاتم نفسنا وبقنا
والحر فينا كان ذليل عايش أجير فى أرضنا
يخدم ف ناس مالهاش مثيل ف الفجر وف فحش الغنى
والآية فجأه اتشقلبت والشلة جوة ف سجننا
والسجن دا مالهوش كبير لو حتى كان ريس لنا
والحق حق وبالأصول والحكم عادل عندنا
والقاضى يحكم بالقانون والشعب مش نايم هنا
مصر النهارده وشعبها بتعيش حلاوة نصرنا
والماضى مش ممكن يعود أو يجى حد يذلنا
والشعب واعى للأفاعى السامهة عاوزه تعضنا
والكلب تلو الكلب لازم ينطرد من أرضنا
ونقوم نكد ونشتغل ونحب أكتر شغلنا
لازم سلوكنا يكون قويم ونصون كرامة بعضنا
ونحافظ احنا عالنظام من غير ماحد يقول لنا
والجار يحافظ عالجيران ويراعى فيهم ربنا
عاوزين يسود الاحترام وبسرعه يرجع أمننا
ونعوض ايام الظلام وبإيدنا تطلع شمسنا
ونطلع الفجر اللى غاب ونقوم نحقق حلمنا
ونطير اسراب الحمام رمز السلام من عندنا