أحمد عمار: صوت من طرة

يا هل ترى.. الناس اللي قاعدين في طره..
بيقولوا إيه؟
سامع أنا صوت من بعيد..
صوت عزمي بيه.. باشا.. السعيد..
سامعه يقول:
"صبرك يا صابر ع المحن..
طول عمرنا..
كنا رجال وقت الشدايد كلنا..
نقتل هنا..
نضرب هنا..
نسرق هنا..
نهبر هنا..
إيه يعني مادام عزمنا..
بيصون بلدنا م الفتن..
صبرك يا صابر ع المحن"..
صفوت ينادي عليه يقول:
احنا الكرام..
صفوة بلدنا العاهرة..
أنا قصدي يعني الطاهرة..
القاهرة..
كل الصعاب..
كنا لها الرمز الشريف..
كنا لها نعم الصحاب..
وحياة غلاوة أرضها..
لنعود كما كنا زمان..
نقتل هنا..
ونضرب هنا..
ونسرق هنا..
ونهبر هنا..
إيه يعني مادام بالشرف..
بنصون بلدنا م الفتن..
صبرك يا صابر ع المحن"..
ويتمتم العادلي في سره:
"يا نصابين..
يا محتالين.."..
وبعلو صوته يقول:
"آمين..
قادر يا رب العالمين..
نخرج بقى من سجننا..
ونعود لأحضان "أهلكم"..
أنا قصدي يعني أهلنا!
والعدل من تاني يسود..
على أرضنا..
نقتل هنا..
ونضرب هنا..
ونسرق هنا..
ونهبر هنا..
إيه يعني مادام بالقانون..
بنصون بلدنا م الفتن..
صبرك يا صابر ع المحن"..
رد بسرور..
عمك سرور:
"الفتح شايفه من بعيد..
والنصر باين ع المدى..
واللي موافق ع الكلام..
من فضله يرفع..
إيده..
وبسرعة أوام..
طبعا تمام..
أصل الموافقة باينة في عينيكم كما نور النهار..
وأنا طول حياتي كنت أنا سيد القرار..
واحنا هنرجع ع الميدان..
ناخد حقوق الشعب من إيد اللي خان..
نقتل هنا..
ونضرب هنا..
ونسرق هنا..
ونهبر هنا..
إيه يعني مادام بالقرار..
بنصون بلدنا م الفتن..
صبرك يا صابر ع المحن"..
ويدوي صوت جاي م السما..
من أعلى حتة في المكان..
"ربي اللي عالم إن أنا..
دايما نظيف..
وإني كما الضيف الخفيف..
على كل قلب في أهل شعبي المخلصين..
وباقول لهم..
يا شعبنا..
يا أهلنا..
كل الحقوق هتكون لكم..
لكنكم..
في حاجة لشوية سِوا..
هنحطكم ع النار شوية صغيرين..
راح تستووا..
ونعيش حياتنا مبسوطين..
نقتل هنا..
ونضرب هنا..
ونسرق هنا..
ونهبر هنا..
إيه يعني مادام بالنضوج..
بنصون بلدنا م الفتن..
صبرك يا صابر ع المحن"..
وبصوت يهز..
وبرتم أحلى م الدرامز..
الرد جه من عند عز:
"احنا.. وبإرادة حديد..
هنعيد لمولانا السعيد..
كل اللي ضاع..
احنا فداه..
طول الحياة..
وباقول له يا أخويا، ويا صاحبي، ويا سيدنا جمال..
يا رمز ثورتنا المباركة الباهرة..
الزاهرة..
الأزمة هتعدي أوام..
والعز تاني يعود لنا..
نقتل هنا..
ونضرب هنا..
ونسرق هنا..
ونهبر هنا..
إيه يعني مادام بالحديد..
بنصون بلدنا م الفتن..
صبرك يا صابر ع المحن"..
والرد جه..
وبصوت حنون..
مليان شجون..
كان من جمال:
"الحزن يا صاحبي كبير..
لكن مازل فيّ الأمل..
والبركة فيكم أجمعين..
الجاي لنا..
بكرة بتاعنا كلنا..
شايف على المدد البعيد..
مكتوب "جمال..
هو الزعيم..
هنموت فداه..
ونعيش عشانه كلنا"..
نقتل هنا..
ونضرب هنا..
ونسرق هنا..
ونهبر هنا..
إيه يعني مادام بالجمال..
بنصون بلدنا م الفتن..
صبرك يا صابر ع المحن"..
وسمعت صوت جاي من بعيد..
"إنت يا بيه..
وإنت يا عم..
يا اللي إنتو خاربين البلد..
عايزين ننام..
السجن مش معمول عشان كتر الكلام..
ماسمعش صوت تاني هنا..
يا صبر صبرنا على جار الهنا"..
وسمعت مصمصة الشفايف طالعة من كل البيوت..
يا رب يا عادل.. ويا قادر.. ويا ساتر.. ويا منان..
إنت اللي واقف جنبنا..
نزرع هنا..
نقلع هنا..
تطرح هنا..
وتعود لنا..
مصر اللي غابت عننا..
نحفظ بلادنا م الفتن..
ونعدي من كل المحن..
*