محمد البدراوى يكتب: مستنيها

ولما شفتك معرفتكش
ولما عرفتك حبيتك
قربت منك وداريتك
جوه حضني وما نسيتك

ضميت حناني بحنانك
ونسيت كل الهم عشانك
عشقت مكانك وزمانك
وآمنت بحبي بإيمانك
وفديته بروحي وفديتك

فرحت معاك وانا وياك
حبيت الدنيا ومعانيها
ودقت هواك مقدرش أنساك
وف ثانية كنت بغنيها
مقدرش أنساك وانا بهواك
وف قلبي عيونك بداريها

مستنيها
تعشق روحي وتسكن فيها
وتداوي جروحي وأداويها
تضحك وتاخدني في دنيتها
تهمسني ف ودني برقتها
وتشوفني سندها ف سكتها
وف حبي تقول كل ما فيها


أتاريها
عكس ما كنت بغنيها
واحدة أنا محلمتش بيها
حرمتني من شوقها وصيتها
والرقة اللي انا بيها حبيتها
اختارت بعدها عن بيتها
فانهارت روحي بقسوتها
وشفت الدنيا وبلاويها


كنت فاكرها حبت قلبي
واللي حتعشق روحي معاها
واللي حتحلم تبقى ف دربي
طول العمر واكون جواها
وحياة الله الخالق ربي
لتلوم روحها على مثواها
وتعرف إنه وكيلي وحسبي
وراح تندم جداً على خطاياها
ساعتها حتيجي تقولي سامحني
وتقول ياريتني عشت ف بيتك