الحلزونة والحلزون اتقابلوا فى التليفزيون

الحلزونة والحلزون
اتقابلوا فى خرم الأوزون
الحلزونة مذيعة جميلة
بيحسبوا أتعابها بالمليون
والحلزون سياسى فاشل
فاشل.. فاشل إزاى وعنده عربية بفريون
الحلزونة نزلت فى الشعب هم وغم.. كد وتكدير
والحلزون مرة يهيص ومرة يليط
مره يغنى و مره يعيط
مرة يجرى ومرة يطير
الحلزونة والحلزون اتقابلوا فى ميدان التحرير
بحر الناس مرعب وخطير
الحلزونة ركبت أول موجة وهوبه تطير
الحلزون فاتته موجة عتية والتانية والثالثة
روح بيته كئيب متكدر
قشره موزه طارت بيه فى الهواء وجابته على ظهره
وكسرتله المناخير
هوبا بقى من شهداء الثورة
وزعمائها ورموزها و ع المنصة لابسين طراطير
الحلزونة والحلزون اتقابلوا فى التليفزيون
ع الهوا علطول فى برنامجها أبو كام مليون
طايرين فى الجو والكون احلو
الحلزونة بعد ما كانت دايما تلبس أسود
لبست ألوان من أثر التغيير
والحلزون لابس بدلة بوص وكرافتة ديبون
الحلزونة والحلزون قاعدين طايرين ف الفريون
الحلزونة بتبشر ببكره المضمون
والحلزون قاعد يجمع ويطرح ويقولك
من الفلوس المنهوبة كل مواطن ياخد كام مليون
والناس قاعدين تتفرج
اللى مرفوت من شغله
واللى مصنعه اتقفل
واللى راجع من الغردقة وشرم مفصول
وأنا قاعد قدامهم مجنون
رايحين على فين ببلادى
أنا محلتيش غيرها
ومن غيرها أتبخر وأهون
الحلزونة بتبشر ببكرة المضمون
والحلزون بيوعد كل مواطن بكام مليون
وبلادى من غير شرطة ولا مدرسة ولا جامعة
وبلادى بلد الأمن
بقى مين يمشى فى شوارعها بعد حداشر مجنون
وبلادى بقى فيها مسلم بيهد كنيسة من غير ما نقول ملعون
ومسيحى بيرد بعنف والجو العام مشحون
ودقيق قرب يخلص
ومواطن يصرخ من الجوع بجنون
غير بورصة انهارت تمامًا
وفلوسنا راحت تماما
والحلزونة والحلزون لسه محتلين التليفزيون
أصل الثورة ليها علينا ضريبة
اللى ميدفعهاش مش مصرى
وأنا قاعد قدامهم مجنون
رايحين على فين ببلادى
أنا محلتيش غيرها
ومن غيرها اتبخر وأهون
والثورة ما هى قامت وغيرت ومشيت
متخلوش الثورة أتون
وتحطونى أنا وبلادى وولادى
ومن المصريين يروحوا ضحايا كام مليون
راحت أرزاقهم وبيوتهم
الثورة بريئة من الحلزونة والحلزون
اللى ركبوا بسرعة عليها علشان يعملوا كام مليون
لسه بنتكلم وبندى وناخد
سيف الجوع كان أسرع منا
أصل العيش لما بيختفى من الشارع
مبتفضلش حيطان تستخبى وراها
ولا أبواب وحصون
الجوعى طلعوا كام مليون
راحوا حرقوا التليفزيون
وجواه الحلزونة والحلزون
وإحنا لسة واقفين ع الخبز فى طوابير
رجعت البيت ملقتش عيالى
رحت أسأل فى ميدان التحرير
لسه على المنصة ناس لابسين طراطير
وشوية ناس قاعدين يتناقشوا
نمشى واللا فى مطالب بتصير
والدخان طالع أسود حالك من التليفزيون
ريحته فظيعة
لو شميت ريحته تطير
والجيش روح
والميدان خرابة كبيرة
واحد وقفنى يسألنى
بيقولوا بيوزعوا هنا أكل
قلتله لسه لما يجيبوا الملايين
وسألته شفت عيالى
قالى وغلاوتك من كتر الجوع
مش شايف غير صراصير