حوار متكرر مع أمى

أهلا يا حبيبى
• أهلا يا أمى إزيك عامله إيه؟
أنا الحمد لله يا حبيبى كويسة طول ما أنا باسمع صوتك.
• اتعشيتى؟
أيوه الحمد لله
• اتعشيتى إيه؟
اتعشيت ملوخية وفراخ
• بالهنا والشفا يا حبيبتى..بجد أنت مبسوطة؟
أه والله مبسوطة يا حبيبى.
• بالأمانة صحتك كويسة..مش تعبانة يعنى؟
ساعات بادوخ شوية ورحت للدكتور قال لى السكر عالى..طاب ليه السكر عالى وأنا مش باكل أى حاجة حلوة ؟ دا حتى اللبن بأشربه من غير سكر.
• لا يا أمى خلى بالك..العيش والرز سكر برضه..عموما متقلقيش هتخفى بس يا ريت تبطلى زعل
طاب ده أبطله إزاى يا ولدى والدنيا كلها مشاكل
• هو أبويا مزعلك؟
لا أبوك طيب حتى لو اتعصب يرجع بسرعة وهو بيزعل قوى لما أكون تعبانه ويبقى قلقان ويقعد جنبى يصب لى حاجة ساقعة قال يعنى دا هيخففنى.
• مهم جدا يا أمى تروحى للدكتور كل شهر مرة على الأقل عشان يظبط لك السكر والضغط.
حاضر يا ولدى.
• قوليلى يا أمى صحيح.. إخواتى البنات عاملين أيه ؟
كويسين أختك اللى ساكنة جنبى علطول معايا وبنتها واخدة بالها منى وأختك اللى ساكنه بعيد بتسأل عليا وساعات بتزورنى واللى عندك فى مصر بتتصل بيا دايما.
• تمام يا امى يعنى أنت بجد كويسة؟
آه والله كويسة؟
• أومال صوتك ليه مرهق؟
شوية برد بساط يا ولدى
• ليه كده بس؟ مش تخلى بالك من نفسك.
مخلية بالى والله بس أنا أصلى خرجت بره قدام البيت شوية..زهقت من القعدة يا ولدى.
• معلش يا حبيبتى
ولادك عاملين ايه.. مش هتجيبهم أشوفهم محدش ضامن عمره؟
• هاجيبهم والله يا أمى بس ياخدوا الأجازة
بقول يا ولدى يمكن مش عايزين يشوفونى
• لا والله دول حتى بيحبوا البلد وهيتجننوا عشان يشوفوكى..آلاء قالت لى امبارح نفسى أشوف أنة وإياد كان عاوز يسافر معايا آخر مرة بس أنا مرضتش عشان دروسه.
هو إياد فى سنة كام دلوقتى؟
• إياد يا أمى فى تانية ثانوى إدعيله عشان مقرف وبيكره المذاكرة مش زى آلاء.
هى آلاء دخلت الكلية؟
• آه يا امى وبتدرس أسبانى ربنا يحميها.
حلفتك بالله يا عبده تجيب ولادك فى أقرب فرصة نفسى أشوفهم يا ولدى يمكن أموت.
• متقوليش كده يا أمى ووعد فى الأجازة الكبيرة هجيبهم دول أنا حايشهم بالعافية وكل شوية يقولوا عاوزين نزور ستى.. ستى وحشتنا.
بجد بيقولوا كده؟
• آه والله يا أمى.
دا إياد لما جه آخر مرة البلد كان مبسوط وبيروح الغيط زيه زى أولاد عمه بالظبط ومكنش حاسس بأى غربة وأنا كنت فرحانة بيه قوى وجده كمان وعمامه وعماته.. ولبس الجلابية واتعامل كما لو كان اتولد هنا.
• أيوه طبعا ما انتو أهله يا أمى هو ليه غيركم ثم دا شرف ليه طبعا.. بس والنبى بجد أنت كويسه ومحدش مزعلك نهائى ؟
آيوه يا ولدى والله ما فيه حاجة.
طيب يا أمى مش عايزة أى حاجة؟
لا يا ولدى ربنا يحبب فيه خلقه ويبعد عنك أولاد الحرام وييسر أمورك.
• ويخليكى ليا يا أمى
أيوه يخلينى عشانك أنت بس.. عشان لما تيجى أستناك واعملك كل حاجة انت عايزها.. أنا بطلب من ربنا يطول فى عمرى عشانك انت يا عبده.. كان نفسى ما تتغربش يا ولدى.
• يا حبيبتى ربنا يخليكى ليا وأنا قريب مش بعيد دى كلها 5 ساعات أكون عندك ثم التليفونات مخلتش دا أنا وأنت ممكن نشوف بعض ونكلم بعض كأننا فى مكان واحد.
أيوه يا ولدى عارفاه البتاع ده اللى بيقولوا عليه الفيس بوك
• صح يا أمى.. بجد مش عايزة أى حاجة.
لا يا حبيبى خلى بالك من نفسك ومتتعبش نفسك فى الشغل..خد أجازة يا عبده
• اتطمنى يا أمى أنا كويس ومش بتعب من الشغل وحاضر هاخد أجازة.
ربنا يحفظك ويحبب فيك خلقه ويبعد عنك الأذى والناس الوحشين.. قولى صحيح هتطلع فى التليفزيون تانى أمتى؟
• يوم التلات اللى جاى يا أمى.
طيب هاستناك وهاتفرج عليك أنا وأبوك كالعادة.. أبوك بيبقى مبسوط خالص لما بيشوفك وانت ما شاء الله زى العسل يا عبده وأفضل اقرأ لك قل هو الله أحد وقل أعوذ برب الفلق.
• طبعا يا أمى مش أبويا ربنا يخليه لينا ويخليكى يا حبيبتى ويشفيكى من السكر يا رب بس أنت بس خدى الدوا فى مواعيده والنبى.
باخده يا ولدى..نص برشامتين كل صبح وساعات الدكتور يقول لى خدى واحدة بس.
• تانى يا أمى مش عايزة أى حاجة.
لا يا ولدى خلى بالك من نفسك وسلم لى على أولادك وخلى بالك منهم وهاتهم قريب اشوفهم.
• حاضر يا أمى مع السلامة
• مع ألف سلامة يا ولدى.