يوميات دكتور متعذب.. هسأل مش هكشف!

سلام عليكم ..الدكتور موجود ؟!
الممرضة: أه موجود.
- ممكن أسأله علي حاجة
الممرضة: كشف حضرتك ؟
- لا أنا هسأله بس مش هكشف !
الممرضة: طب ثواني.
الممرضة: دكتور في واحد عاوز يسألك علي حاجة؟
أنا: واحد مين؟! كشف يعني؟!
الممرضة: لا هيسأل بس علي حاجة؟
أنا: يابنتي هو إحنا في ميكروباص، وقاعد جمب واحد عرف إني دكتور أسنان فهيسأل بس؟
الممرضة: شوفه وخلاص يمكن يعمل أي حاجة ونطلع منه بمصلحة ...أنت خسران إيه ..ماحنا بننش ونهش أهو
أنا: علي رأيك ...دخليه
-دكتور معلش ممكن أسأل حضرتك علي حاجة؟
أنا: اه اتفضل ..
- أنا كنت عاوز أشوف الضرس ده ماله ؟ عاوز يتحشي ولا إيه
ولو عاوز أركب الضرس ده يصرفله قد إيه ؟
وابني عنده 7 سنين ولسه مبدلش ...ومراتي ريحه بقها مهببة
..وأمي سنانها ملخلخة.
وحمايا عاوز يركب طقم ...حضرتك بتركب أطقم ؟
اه حضرتك أنا بعمل كل حاجة ..وبتشقلب في الهوا، وبجيب اجوان باكورد كمان
أنا كتور جيمي المتكامل
- طب ممكن تبصلي علي الضرس ده ...ده أنا هجبلك الناس كلها تكشف عندك ..أنت راجل سكرة
(بيثبتني يعني وكده) اه اتفضل يا حبيبي وماله ...الضرس ده مسوس .. ولازم يتحشي عصب أو تخلعه عشان الوجع يروح.
طب شكرا يا دكتور ....ممكن بس حضرتك تكتبلي مسكن أو أي حاجه تهديه شويه ؟!لحد أما ابقي أجي أن شاء الله.
أنا : اه طبعا ممكن يا حبيبي.
يا ابتسااااااام : بوشوشها في ودنها ... بقولك إيه الراجل ده تاخدي منه 20 جينه.
المريض : شكرا أوي يا دكتور ربنا يخليك.
أنا : حبيبى ..أنا تحت أمرك في أي سؤال ... اعتبرني عبد الوهاب مطاوع، أو أسامةمنير، وتعالي في أي وقت أو حتي سماح أنور وكلمني كل يوم من 12-2، وأنا هرد عليك بنفسي.
ابتسام : حضرتك عاوزين 20 جنيه
المرييض : إيييه !!!! ليييييييييه ده الكشف ب 10 !!! ادفع في السؤال 20 !!!
وبصوت عالي يا دكتوووووور
20 جنيه ليه؟
أنا : حضرتك أنا عندي الكشف ب 10 ...والسؤال ب 20 ....هو ده نظام العيادة
المريض : بص يا دكتور العصفورة ....
أنا : فيين دي .. فيين هااا فييين؟
الممرضة: الحق يا دكتور ده جري