أبدأ كلامى

بالصلاة على النبى وألعن أبو اللى مخبى مال المسلمين
واللى خد مال البنوك سرقه وسافر واللى غرق مركبه ألف ومتين
واللى زور واللى نافق واللى دلس واللى خد بالقوة حق الغلبانين
واللى حط لجام على لسان البشر واللى حط ف كرشه مال الشقيانين
واللى سرق اللقمه من بق الغلابة واللى قاعد على الكراسى من سنين
والعن اللى ف المجالس لسه قاعد شغلته يسقف ويرفع الإيدين
وألعن الأقزام فى كل كتاب وملة والطوال ملعون أبوهم مرتين
والأبالسة اللى بقانون الطوارئ لجموا لسان الخلايق والعنين
لفقوا الدستور عشان حبة مصالح بعد ما كانت الرياسه مدتين
واشتروا الدنيا وسابوا الآخرة تخرب والضمير ضربوه فى وشه بلغتين
والعن اللى ساب بلد تخرب وتغرق باعها للسمسار بفكه وجنيهين
واللى غلى الكيماوى والتقاوى واللى نشف دم كل الفلاحين
واللى خلى الناس على القهوه تزاحم واللى ساق الناس لسوق العطلانين
وألعن الطرطور والعن كل عمه فوق دماغ أراجوز بيفتى ف كل دين
واللى افتى بقطع ايد سارق رغيف من زبالة قصر فيه اكبر بسين
وألعن الخوازيق اذا كانت مقاسى أو مقاس مظلوم ف سجن المظلومين
وألعن الأراجوز إذا كان ف الوزارة فى كل كلمة وكل رأى يقول آمين
وألعن الشرطى اللى ساجن الدكاترة والبلد مليانة سفة ومجرمين
وأنهى كلامى بالصلاة على النبى وألعن أبو اللى دفعنى للقول الحزين