منة الله جابر تكتب: الراجل مش فارس ولا البنت أصلاً سندريلا

أنا هتكلم النهاردة عن وجهة نظرى الشخصية ولا أمثل أى حد ولا بنتقد ولا بتفق مع أى حد أنا بمثل نفسى وأفكارى ومجموعة قليلة من الناس المحيطة بيا وبس ..
خلينىى أحكيلكم حكاية أحسن أنا أصلا بحب الحواديت..
كان يا مكان فى نفس العصر اللى إحنا فيه ده بالذات.. من كام سنة كده مش من كتير اوى يعنى كنت أعرف اتنين حبوا بعض جدا وارتبطوا واتعلقوا ببعض وكانوا مع بعض ليل نهار الكلام ده كنا فى سنة أولى كلية يعنى سورى شوية عيال بعد كام كلمة حلوين وكام موقف أحلى قرروا أنهم يتخطبوا آه ده حقيقى والله كنا الحمد لله كبرنا سنة وبقينا فى سنة تانية.. القرار اللى كان يخض بجد أنهم قرروا يتجوزوا البنت عرضت الفكرة على أهلها لكن باباها عارض وبشدة لأنهم لسه عيال!!
الأب قرر يفهم البنت وبمنتهى الهدوء والعقل "يابنتى أنتى بكرة هتتغيرى أنتى بنوتة ذكية عندك أحلام كتير بعد ماتتخرجى وتشتغلى هتلاقى دماغك بتتغير وأفكارك بتتغير حتى قلبك هيتغير أنا مقولتش أنه وحش بس اللى أنتى شايفاه مناسب دلوقتى ممكن ميبقاش مناسب ليكى بعدين".

زعلوا وغضبوا واتعصبوا وفى الآخر خضعوا وسمعوا كلام أهل البنت وعدت الأيام والسنين جربوا كل حاجة راحوا كل مكان كبروا مع بعض يوم عن يوم كانوا بيكتشفوا الدنيا وبيكتشفوا بعض!!
اتخرجوا ومع أول نجاح للبنت بانت حقيقة الولد فى شوية غيرة منها ليه تشتغل قبلى وفى نفس مجالنا وأنا مسحول فى تخليص ورق التجنيد وحوارات بس حبهم كان أقوى وفضل مكمل برغم أنه قل حبة اتخطبوا والبنت نجحت تانى والولد حقيقته بانت اكتر إزاى هى بتعمل كل اللى هى عايزاه وأنا وأقف مكانى حتى الشغل اشتغلته واسطة لحد ماحصل الصدام ونبوءة الأب اتحققت والبنت اكتشفت أنه كان على مقاسها زمان بقا أصغر كتير من مقاسها دلوقتى..
علميا البنت والولد لما بيكونوا فى سن واحد البنت بتكون دماغها أكبر من الولد ده مش كلام وخلاص ده واقع وعن تجربة ودراسة وده اللى حصل بالظبط مع صحابنا فجأة لاقت نفسها سابقاه بكتير لدرجة أنها بقت مبتعرفش تتكلم معاه ولا حتى تشاركه نجاحها بقت بتعرفه من باب الواجب واتقلبت الموازين وفى يوم وهما بيتكلموا وبيجهزوا لبكرة سرحت اتخيلت بكرة معاه وجانبه لاقت نفسها ملانة شافته أصلع وعنده كرش من كتر القعدة على القهوة حست أنها عايزة تهرب شافته واحد أقصى طموحاته أنه ياكل وينام حست أنها مخنوقة وشافت نفسها بتفشل فى حدوتها وهى لسة فى أولها !!
أنا شوفت القصة دى بتكرر كتير بس مع الأسف فى ناس بتكمل عشان بتخاف .. بتخاف تبدا من الأول.. بتخاف متلاقيش اللى يفهمها اللى يحبها.. بتخاف أنها ترجع لوحدها لاعتقادها انها هتبقى لوحدها والخوف ده كان سبب فى ارتفاع نسب الطلاق وحالات التوحد بين الأطفال وأمراض نفسية كتير هتطلعنا جيل مشوه نفسيا والسبب الجواز المبكر بدون وعى..
من وجهة نظرى الضئيلة أننا قبل مانتجوز لازم نوصل ولو لجزء صغير من أحلامنا نشتغل ونسافر ننجح ونفشل نجرب ونتخلى عن فكرة الفارس اللى بحصان أبيض وسندريلا اللى زى القمر .
لما نقرر ناخد خطوة الجواز طبعا لازم نكون بنحب جدا أنا مؤمنة جدا بده بس لازم برضو نفهم أن الحب ده رقم على قائمة كبيرة لازم تبقى موجودة فينا احنا الاتنين عشان جوازنا يكمل وننجح ونطلع للدنيا جيل سليم نفسيا ونعيش واحنا راضين على الأقل عن اختيارنا ومنندمش .
وأنت بتاخد قرار الجواز لازم يكون قلبك وعقلك متفقين على الشخص ده غمض عينك وشوف نفسك كمان كام سنة هاتبقى عايش معاه إزاى الناس بتبان ياجماعة مع المواقف الأسلوب والتعامل اعرفوا عيوب بعض قبل مميزاتكم حبوا بعض جدا واتجننوا بس اعرفوا أنه هايجى يوم والجنان ده يهدى مع زحمة المسئوليات ومش هاتفضلنا غير الأيد اللى تشدك وقت ما تقع وتساعدك تقوم وأحسن من الأول كمان
غمضوا عينكم واتخيلها/ اتخيليه وهو / وهى متعصبة مين فيكم هيعدى ومين هيعند ويتعارك أكتر.
غمضوا عينكم واتخيلوا نفسكم وأنتوا سهرانين عشان عندك / عنده مشروع مهم فى الشغل ولازم يتسلم هاتسيبك / هايسيبك لوحدك وينام
غمضوا عينكم واتخيلوا بعض وقت التعب ياترى هتاخدوا إجازة من الحياة عشان تفضل / تفضلى جانبه بتديلوه الدوا وتاكيله.
غمضوا عينكم واتخيلها وقت اكتئابها هتجبلها شيكولاتة وتقعد تضحك فيها وتسيب الدنيا عشان تفضل جانبها وهىى بتعيط من غير سبب !!
غمضوا عينكم واتخيلوا فى وسط ماهو راجع تعبان آخر اليوم من شغله هتحضريله أكلة بيحبها وتقعدى تسمعى كلام يصدع عن الشغل وبس وغالبا مش فاهمة ربعه
هاتسيبوا لبعض المساحة أن كل واحد فيكم ينزل مع صحابه عشان يفك شويا هتشاركوا بعض اهتماماتكم يا ترى هتعرفوا تشدوا بعض للنجاح وتفخروا ببعض
فكروا كويس ياجماعة وبلاش جواز بدون وعى بلاش جواز قايم على حب عيال بلاش حسابات مالهاش غير نهاية واحدة بلاش فشل النجاح طعمه حلو ..
نصحيتى ليكى الحياة مش راجل متضيعيش سنين عمرك وترجعى تقولى أنا فين بعد فوات الاوان دورى على نفسك واعرفى الدنيا اعتمدى على نفسك خليكى قوية وبعدين دورى على اللى شبهك اللى يكمل حتة البازل اللى ناقصة فيكى مش يمحيكى ويعملك نسخة من انسان إلى وشوية ويزهق منها..
نصحيتى ليك الجواز مش هو الإنجاز اللى لما تحققه هاتبقى عملت اللى ميتعملش الناس كلها بتتجوز على فكرة الجواز حاجة مكملة لحياتك دور على اللى تبقى ضهر تتسند عليه لما الدنيا تيجى عليك الجواز مش بنت زى القمر عشان أنا آسفة أنى أقولك أن الواقع يختلف كتير عن التلفزيون ياعزيزى !!
اتجوز اللى تحرك عقلك قبل قلبك اتجوز اللى روحها حلوة بتحب تضحك عشان هى دى اللى الحياة هاتبقى بجد معاها حياة ..
اختاروا اللى عيالكم يفتخروا بيه خلى بنتك تبقى نفسها تطلع شبه مامتها خلى ابنك يبقى حلمه أنه يبقى زى باباه اختاروا صح عشان ده الاختيار الوحيد اللى الغلطة فيه بعمر تعيس ..
* * * *
إضافة تعليق