أفهم أن واحد زى سمير زاهر يحاول يستعين بالأفضل لكرة القدم، اللى ربنا يستر وماتنهرش على رؤوسنا. أفهم أن السيد سمير بن زاهر يطلع يقول: إن المرحلة المقبلة محتاجة مصارحة بعدما أصبحت الكرة المصرية على وشك التراجع.. واسألوا منتخب الكابتن محمد عمر مواليد 1994، أو منتخب الناشئين اللى هو منتخب الأمل مش كده خرج بفضيحة للجبلاية طبعا مش لمصر، اللى هى أكبر من الجبلاية وأى حكاية! أفهم أن بن زاهر وبن هوارى.. وكل الزعماء الكرويين يفضوها سيرة ويعلنوا ندمهم على خراب اللعبة. لكن اللى مش مفهوم هو إن حمادة شادى مسئول العلاقات الدولية يكون ضيفا فى برنامج تليفزيونى هو برنامج "لطشات" تقديم العبد لله كاتب هذه السطور ويفتح ملف أن الكرة المصرية متأخرة 50 سنة عن العالم، فيكون جزاؤه التحويل للتحقيق! طب أفهم إن اللى يتحول للتحقيق يكون عمل مصيبة مثلا ترك منتخب الناشئين بدون قيادة كروية لأنه بيلعب فى رواندا المسكينة فيكون رئيس البعثة الأخ هانى زادة رئيس منطقة الجيزة على أساس أن الناشئين مهمين لمحافظة واحدة بس! أفهم أن اللى يتحول للتحقيق يكون سبب تأخير صرف فلوس الحكام، أو عدم البحث عن الفلوس "المسروقة" بتاعة منتخب الشباب من ساعة كأس العالم 2009! أفهم كمان إن اللى يتحول للتحقيق يكون السبب فى رحيل الجوهرى "الفاشل" فى الكرة الأردنية واسالوا الخبراء مين هو الجوهرى.. الراجل اللى حول طموح الكرة الأردنية من المحلية للقارية والعالمية بهدوء وأصبح "النشامة" كبار كرويا شفتم الجوهرى فاشل إزاى؟! أفهم أن اللى يتحول للتحقيق يكون عامل الجبلاية "عزبة" فلوس لكل اللى يمر من أمامها.. علشان كل يدارى.. أى والله! إنما تحاول أن توضح أى حقيقة يخرج عليك جماعة تكميم الأفواه فى الجبلاية وهات يا.. ولا ما فيش داعى! أفهم أن اللى يتحول للتحقيق يكون عارف كويس حجم السبابيب ورجع الفلوس بعد توجيه إنذار قانونى .. وماحدش سأله عن فوائد أكثر من 22 مليون جنيه لم تحصل لمدة 3 سنوات، يعنى فوائدهن كبيرة حبتين يعنى ! أما اللى ما أفهموش أن يتم تحويل للتحقيق كل من يقدم معلومة حقيقة عن سبب تخلف الكورة فى المحروسة، وكمان شوية ها يتم تحويل كل من يخفى معلومات حقيقية تفيد اللعبة للخزينة علشان يقبض المكافأة! لكن اللى مش مفهوم هو أن يحول حمادة شادى للتحقيق، لأنه قدم دليل تأخر الكرة المصرية والله عيب! يا سيادة رئيس الجبلاية.. هو أنت إيه يا أخى، ناقص والله نسميك زين العابدين بن زاهر بس ها نؤجل التسمية إلى أن يهدد حمادة شادى بحرق نفسه، أو ربما يحرق نفسه بجد! فخامة الرئيس الكروى.. حرام كفاية.. لازم نشوف حل بدل ما يحرق نفسه كل اللى نفسه يشوف الكرة المصرية بعيد ولو لمرة عن ثقافة عنق الزجاجة فرضتها علينا.. ويا أخى السماء نزله تقدم لك إشارات نفوز بكأس أمم وتعدى على خير بلاوى كتير" موضوع الفلوس، والوكالة الإعلانية بتاعة الكواليس ويفضل مكتوم.. أنك تفوق.. أبدا.. أنت حر فى الجزء اللى يخصك، أما أحلام الناس الطيبين المصريين فلن تتركك تتلاعب بها وكفاك تهديد ووعيد للبشر المخلصين.. أنت مش حمل واحد يشعل النار فى نفسه.. لأنك مش هاتلحق تهرب يا بن زاهر. والله دى مصيبة.. ممكن تحصل على معلومات من الدولة.. وتنتقد الدولة.. لكن معلومات عن جبلاية "بن زاهر" أو انتقاد لفخامته ممنوع خالص لأن دى توديك فى داهية كروية؟!
